Tbilisidə ən böyük etiraz aksiyası keçiriləcək

Gürcüstanın ictimai təşkilatları Şənbə günü, mayın 11-də “xarici agentlər” haqqında qanunun qəbuluna qarşı böyük etiraz aksiyası təşkil edir.

Yenisabah.az xəbər verir ki, o, ən irimiqyaslı aksiyalardan birinə çevrilə bilər.

Şənbə günü Tbilisidə keçirilməsi planlaşdırılan “Avropa marşı”nın bütün ölkədə - Telavi, Borjomi, Qori, Kutaisi, Zuqdidi, Batumidə həftə boyu kiçik etiraz aksiyalarının kulminasiya nöqtəsi olacağı güman edilir.

Tbilisidəki yürüş üç ayrı yerdə toplaşmağa başlayacaq, buradan saat 19:00-da etirazçılar Avropa Meydanındakı toplaşma məntəqəsinə keçəcəklər.

Gürcüstan parlamenti iki oxunuşda qəbul edilmiş “Xarici təsirin şəffaflığı haqqında” layihəsinə mayın 13-də qayıtmağı, yekun səsverməni isə mayın 17-də keçirməyi planlaşdırır. Bu gün Gürcüstanda Ailə Müqəddəsliyi Günü qeyd olunur, bununla bağlı dindarların nümayişləri keçirilir.