"Slovakiyanın Qərvənd kəndinin bərpasında iştirakı dostluğumuzun bariz nümunəsidir" - Deputat

Xəbər verdiyimiz kimi, ötən gün Slovakiyanın Baş naziri Robert Fitso ölkəmizdə səfərdə olub. Azərbaycan Prezidenti İlham Əliyev və Robert Fitso mətbuata bəyanatlarla çıxış ediblər.

Azərbaycanla Slovakiya arasında müdafiə sənayesi sahəsində birgə istehsal sahələrinin yaradılması haqqında danışıqlara başlanılıb. Ölkə başçısı bildirib ki, Slovakiya və Azərbaycan bu gün suverenlik və ləyaqət əsasında qurulmuş siyasətlə idarə olunur.

Ağdamın işğaldan azad edilmiş Qərvənd kəndinin yenidən qurulması da Slovakiya şirkəti tərəfindən icra ediləcək.

Milli Məclisin deputatı Aydın Mirzəzadə Slovakiyanın Baş nazirinin ölkəmizə səfəri, azad olunmuş ərazilərdə quruculuq işlərində görüləcək dəstək haqqında Redaktor.az-a danışdı.

Millət vəkili dedi ki, Azərbaycanın beynəlxalq aləmdə apardığı dostluq, əməkdaşlıq və planet üçün ümumi olan problemlərin həllində ümumi səylərin göstərilməsi siyasəti onun nüfuzunu daim artırır:

"Bu qəbildən də, biz vaxtaşırı xarici ölkə rəhbərlərinin Azərbaycana səfərlərini, onların tək energetika ilə deyil, digər məsələlər üzrə əməkdaşlıq təkliflərini eşidirik. Slovakiya ilə Azərbaycan arasında son dövrdə hərtərəfli əməkdaşlıq fəaliyyəti genişlənir. Slovakiya hökumət rəhbərinin Azərbaycana səfəri də bu əməkdaşlığın daha da dərinləşməsini göstərir. Hər iki tərəf əməkdaşlığa, birgə fəaliyyətdə maraqlıdırlar. Əlbəttə, Azərbaycan çıxartdığı qazın müəyyən bir hissəsini Slovakiyaya satmağa hazırdır. Bu məsələdə artıq ümumi razılıq əldə edilibdir. Slovakiya şirkətinin işğaldan azad olunan ərazilərdə bir kəndin bərpa edilməsində iştirakını da, iki ölkə arasında dostluğun bariz nümunəsi kimi qiymətləndirmək olar".

Humay İSGƏNDƏRLİ