Şuşalı jurnalist: "Qələbədən sonra Şuşanın işğal tarixinə qayıtmaq istəmirəm"

“8 may 1992-ci il- bu tarix Şuşanın sonuncu işğal tarixdir. Qələbədən sonra bu tarixi haqlı olaraq xatırlamaq, o dövrə qayıtmaq istəmirəm”. 

 

Bu fikirləri Moderator.az-a Şuşadan olan jurnalist Bəxtiyar Məmmədli bildirdi. Onun sözlərinə görə, indi 8 may tarixini daha çox o acı günləri xatırlayan şəhid ailələri və qazilər xatırlayır, unutmur:

 

“8 may 1992-ci ildə Şuşanın işğalı zamanı atam Məmmədov Feruz Heydər oğlu da ermənilər tərəfindən əsir götürülüb. Sonrakı dövrdə onun həyatda olub-olmaması barədə heç bir məlumat əldə edə bilmədik. Ona görə də atama şəhid statusu verildi. Şükür ki, Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusu torpaqlarımızı işğaldan azad etdi. İstər I Qarabağ, istərsə də II Qarabağ savaşında şəhid olan vətən oğullarına Allah rəhmət eləsin! Biz onların sayəsində bu gün Şuşaya və digər işğaldan azad edilmiş ərazilərə, evimizə qayıdırıq”.

B.Məmmədli tezliklə Şuşaya qayıdışın olacağını dedi: “Şuşanın işğaldan azad olunmasından sonra bir oğul olaraq borcumdur ki, atam Feruz Məmmmədovun nəşinin tapılmasına nail olub, onu dəfn edəm. Bəlkə bundan sonra anamın və bütövlükdə ailəmizin gözü yollardan çəkilə".