Fərid Məmmədov: DOST mərkəzlərinə indiyədək 2,5 milyondan çox vətəndaş müraciəti daxil olub

Bakı, 8 may, AZƏRTAC

DOST mərkəzlərinə indiyədək 2,5 milyondan çox vətəndaş müraciəti daxil olub. Vətəndaşların həmin xidmətlərdən məmnunluq səviyyəsi 98,2 faiz təşkil edib.

AZƏRTAC xəbər verir ki, bunu DOST Agentliyinin İdarə Heyətinin sədri Fərid Məmmədov 1 saylı Bakı DOST Mərkəzinin fəaliyyətinin və vətəndaşlara DOST xidmətlərinin göstərilməsinə başlanılmasının 5 illiyi münasibətilə keçirilən mətbuat konfransında deyib.

Agentliyin İdarə Heyətinin sədri Fərid Məmmədov bildirib ki, vətəndaşlara 159 dövlət sosial xidmətlərini “bir pəncərə”dən, modern və çevik, şəffaf mexanizmlərlə təqdim edən DOST konsepsiyası xidmət səviyyəsini hər il daha da yüksəltməyə nail olur.

Onun sözlərinə görə, 1 saylı Bakı DOST mərkəzi gün ərzində 800-dək vətəndaşa “bir pəncərə”dən xidmət göstərir.