Con Uilyamsdan ümidləri artıran faiz açıqlaması

Nyu-York FED sədri Con Uilyams ABŞ Federal Ehtiyat Sisteminin faiz siyasəti ilə bağlı fikirlərini bölüşüb.

Fins.az xəbər verir ki, sədr, hələ vaxtın müəyyən edilməməsinə baxmayaraq, FED-in faiz dərəcəsi hədəfini nə vaxtsa aşağı salacağına inandığını bildirib. Faiz endiriminin sonda ediləcəyini deyən Uilyams, hazırda həyata keçirilən pul-kredit siyasətinin çox yaxşı vəziyyətdə olduğunu sözlərinə əlavə edib.

FED-in uçot faizini nə vaxt endirə biləcəyi ilə bağlı proqnoz verməkdən çəkinən Nyu-York FED sədri, iqtisadiyyatın ümumiyyətlə daha yavaş böyümə yaşayacağını bildirib. Buna uyğun olaraq, Uilyams, keçən il sürətlə artan ABŞ ÜDM-nin 2024-cü ildə 2% - 2.5% artacağını proqnozlaşdırır.

FED-in balans azaltma cəhdlərinə də toxunan Con Uilyams, bu səylərin yaxşı həyata keçirildiyini və bazarları sarsıtmadığını bildirib. İnflyasiya mövzusuna toxunmayan New York FED sədri, xüsusilə keçən həftəki əmək bazarı hesabatından sonra faiz artımı ehtimalını qiymətləndirən FED İdarə Heyətinin üzvü Bouman ilə müqayisədə daha mülayim bir açıqlama verdi.

Riçmond FED sədri Barkin diqqəti ABŞ-da inflyasiyaya yönəltdi

Riçmond FED sədri Tomas Barkin, ABŞ-da iqtisadiyyatın təklif tərəfindəki yaxşılaşmalarla qiymət təzyiqinin azaldığını bildirib və inflyasiya hədəfinə çatmaq üçün tələbi məhdudlaşdıran tədbirlərin görülməsi lazım olduğunu müdafiə edib.

Barkin həmçinin faiz dərəcəsini ötən ilin iyul ayından bu yana 5.25% ilə 5.5% arasında saxlamağı faydalı hesab etdiyini və bu dövrdə iqtisadiyyatın çox qızmadığını bildirib. Bundan əlavə, Riçmond FED sədri inflyasiyanın gözlənildiyindən daha ləng azalmasını FED-in üzləşdiyi risklərdən biri kimi gördüyünü bildirib.