Hava Yolları Şirkəti 66 milyon dollar cərimələndi

Avstraliyanın “Qantas” şirkəti "kabus uçuşu" qalmaqalı ilə bağlı əvvəllər ləğv edilmiş reyslərə bilet satmaqda ittihamlandıqdan sonra 66 milyon dollar cərimə ödəməyə razılaşıb.

Hafta.az-ın yazdığına görə, Avstraliya Rəqabət Təşkilatı bildirib ki, şirkət on minlərlə ləğv edilmiş uçuşlarda oturacaqlar sataraq "istehlakçıları aldatdığını" etiraf edib. Onlar həmçinin ləğv edilmiş və ya dəyişdirilmiş reyslərdən təsirlənən təxminən 86 min sərnişinə 13 milyon dollar təzminat ödəyəcəklərini açıqlayıblar.

Avstraliya Rəqabət və İstehlakçı Komissiyasının baş icraçı direktoru Qina Kass-Qottlieb, "Qantas”ın davranışı dəhşətli və qəbuledilməzdir. Bir çox istehlakçı ləğv edilmiş reyslərdə bilet bron etdikdən sonra tətil, biznes və səyahət planları qurdu" deyib.

“Qantas” etiraf edib ki, bəzi hallarda sərnişinlər ləğv edilmiş reyslər üçün biletləri "iki və ya daha çox gün əvvəldən" sifariş ediblər.

“Qantas”ın baş direktoru Vanessa Hudzon, şirkətin istehlakçıları məyus etdiyini və standartlarından geri qaldığını etiraf edərək, "Biz bilirik ki, bir çox müştərilərimiz ləğv bildirişlərini vaxtında təqdim etməməyimizdən təsirləniblər və səmimi qəlbdən üzr istəyirik" deyib.

103 il əvvəl qurulan Avstraliya şirkəti son illər baş verən bir sıra böhranlardan sonra imicini yaxşılaşdırmağın yollarını axtarır. Səyyahlar tərəfindən yüksək bilet qiymətləri, xidmət səviyyəsinin aşağı düşməsi ittihamları və pandemiya zamanı təxminən 1700 yerüstü işçinin ixtisarına görə tənqid edilib.

Keçən ilin sentyabrında şirkətin baş direktoru Alan Goes bir sıra tənqidlərdən sonra erkən təqaüdə çıxacağını açıqlamışdı.