Polşa hökuməti Dudanın Trampı Rusiyaya qarşı çevirə biləcəyinə inanır

Polşa hökuməti hesab edir ki, ölkə prezidenti Anjey Duda Rusiyaya münasibətini dəyişmək üçün Donald Trampa təsir göstərə biləcək. 

HİT.az xəbər verir ki, bu barədə "Politico" qəzetinin Avropa bürosu mənbələrə istinadən yazıb.

"Tramp öz eqosunu sığallamaqdan başqa heç nəyi sevmir və Polşanın mühafizəkar Hüquq və Ədalət Partiyası (PiS) və Dudanın Donaldı sakitləşdirməkdə kifayət qədər təcrübəsi var", deyə məqalədə qeyd edilir.

PiS siyasətçiləri müntəzəm olaraq ABŞ-da mühafizəkar toplantılarda çıxış edirlər. Duda ABŞ prezidenti Co Baydeni 2020-ci il seçkilərində qələbəsi münasibətilə təbrik etməkdən imtina edən bir neçə nəfərdən biri idi və 2018-ci ildə PiS hökuməti Ağ Evi ABŞ qoşunlarını Polşada yerləşdirməyə təşviq etmək üçün hətta Polşadakı bazanı "Fort Tramp" adlandırmağı da düşünmüşdü.

ABŞ Konqresi Ukraynaya əlavə yardımı təsdiqlədikdən sonra PiS bunun daha əvvəl Ukraynanın ehtiyaclarını müzakirə etmək və Nümayəndələr Palatasının spikeri Mayk Consonla görüşmək üçün Nyu Yorkda Trampla görüşən Polşa prezidentinin təsiri ilə bağlı olduğunu bildirib.

"Politico" qeyd edir ki, Polşa hökuməti Trampı eşitməkdə üstünlük görür və onun üzərində təsirini artırmağa çağırır.

"Ümid edirəm ki, Nyu-Yorkdakı görüş zamanı prezident Polşa hökumətinin tövsiyəsindən istifadə edib və təhlükəsizlik məsələlərinə Polşanın nöqteyi-nəzərini təqdim edib", deyə nəşr Polşanın baş naziri Donald Tuskdan sitat gətirir.

"Politico" vurğulayır ki, Polşa və ABŞ Rusiyanın yaratdığı risk, eləcə də Trampın ikinci prezidentliyi dövründə ABŞ-ın NATO-dan çıxması və Avropanı tərk etməsi təhlükəsi mövzusunda həmrəydir.

Duda ilə görüşdən sonra amerikalı siyasətçi Rusiya Federasiyasına münasibətini dəyişib. Lakin əksər politoloqlar hesab edir ki, bu, Polşanın təsirindən daha çox təsadüfi vaxtın nəticəsidir.

Samir