Qanada britaniyalıların müstəmləkəçilik dövründə talan etdikləri ləl-cəvahirat sərgisi açılıb

Bakı, 6 may, AZƏRTAC

Britaniya müstəmləkəçiliyi dövründə Qanadan qarət olunan qızıldan hazırlanmış boyunluq lövhələr, qılınc, kral kürsüləri və onlarca qiymətli əşyaların ölkəyə tarixi qaytarılması baş verdikdən sonra onlar ilk dəfə olaraq sərgilənib. İnsanlar qaytarılan sərvəti görməkdən ötrü Qərbi Afrika ölkəsinin hər bir tərəfindən Kumasi şəhərinə, kral Asantehene kimi tanınan II Asante Otumfuo Osei Tutunun iqamətgahına axışıb gəlirlər.

AZƏRTAC xarici mediaya istinadla xəbər verir ki, qızıl reqaliyalar müasir Qananın ərazilərinin 1821-1957-ci illərdə Britaniya müstəmləkəçiliyi altında olduğu dövrdə talan edilib. Ləl-cəvahiratların böyük hissəsi Asante krallığı ilə amansız döyüşlərdə daşınıb və muzeylərə yerləşdirilib.

Londonda Britaniya muzeyi, eləcə də Kaliforniya Universitetində Fauler muzeyi artefaktları bu il Qanaya qaytarıblar. Bu, Qərb təsisatlarının müstəmləkəçilik irsinə yenidən baxılmasına artan cəhdin bir hissəsidir.

ABŞ-da və Avropada yerləşən digər muzeylər də müasir Nigeriya ərazilərindəki Benin Krallığından talan olunan qiymətli əşyaları qaytarmağa razılaşıblar.

Qeyd edək ki, Böyük Britaniyanın bəzi əsas muzeylərinə öz kolleksiyalarının böyük hissəsini ötürmək və ya idarə etmək qanunla qadağan olunur. Beləliklə, Britaniya muzeyindən, eləcə də Viktoriya və Albert muzeyindən 32 eksponat kirayə hüququna müvafiq olaraq Qanadadır.

“Biz imperiya münaqişəsi və müstəmləkəçiliyin yara vurduğu bu əşyaların əldə olunması ilə bağlı ağrı-acılı tarixi etiraf edirik”, - deyə sərginin açılışında Viktoriya və Albert muzeyinin direktoru Tristram Hant qeyd edib.