Müharibə

İki NATO ölkəsi Rusiya silahlarını Ukraynaya vermək istəmir

reyting.az

00:06 06.05.2024

Smartbee
Şikayət et

Amerika Birləşmiş Ştatlarının istəyinin əksinə olaraq, Türkiyə və Yunanıstan Rusiya istehsalı olan zenit-raket sistemlərini Ukraynaya verməkdən imtina edirlər.

Reyting.az “Forbes”-ə istinadla bildirir ki, Ukraynada vəziyyətin gərginləşməsi fonunda Avropa İttifaqı Yunanıstana təzyiq göstərməyə başlayıb və onu ukraynalılara tanış olan “S-300” sistemlərini Kiyevə verməyə çağırıb. Bununla belə, Yunanıstanın baş naziri Kiriakos Mitsotakis “S-300” sistemləri üçün hətta raketlərin verilməsini də istisna edib.

Baş nazir aprelin 25-də yerli televiziyaya müsahibəsində bildirib ki, Yunanıstan Ukraynaya “S-300” və ya “Patriot” göndərmək niyyətində deyil.

Bir az sonra Türkiyənin müdafiə naziri Yaşar Gülər də oxşar bəyanatla çıxış edib.

Gülər mayın 2-də deyib ki, ölkəsinin “S-400” sistemini hansısa ölkəyə verməsindən söhbət gedə bilməz.

“Forbes”-in qeyd etdiyi kimi, yunan “S-300”-ləri əvvəlcə Kipr üçün nəzərdə tutulsa da, Türkiyədən gələn təhdidlərə görə onlar 1990-cı illərin sonunda Kritə göndərilib. 2013-cü ildə isə yunanlar ilk dəfə bu komplekslərdən raketlərin təlim atışını həyata keçiriblər.

Qeyd edək ki, ABŞ-nın illərlə xəbərdarlıqlarından sonra Türkiyə “S-400”-ləri 2019-cu ildə birbaşa Rusiyadan alıb. Bundan sonra isə Türkiyə Vaşinqtonun sanksiyaları ilə üzləşib və yeni nəsil “F-35” qırıcıları üçün satınalma növbəsindən çıxarılıb. Ankara hələ də “F-35” proqramına qayıtmaq müqabilində Rusiyanın hava hücumundan müdafiə sistemlərindən qurtulmaqdan imtina edir.

Açıq mənbə məlumatlarına görə, bu gün Yunanıstanın 32 “S-300” buraxılış qurğusu üçün təxminən 175, Türkiyənin isə iki “S-400” diviziyası üçün 120-dən çox raketi var.

E. KAMAL
Reyting.az

Bütün xəbərləri reklamsız oxumaq üçün qeydiyyatdan keç və ya login ol. Günlük ölkədə baş verən xəbərləri bizdən izlə.

Seçilən