Reuters: Makron Si Cinpinə təzyiq etmək niyyətindədir

"Çin prezidenti Si Cinpin bazar günü Parisə yola düşüb. Fransalı həmkarı Emmanuel Makron ona ticarət balanssızlığını azaltmaq üçün təzyiq göstərməyi planlaşdırır və onu Ukraynadakı müharibədə Rusiyaya təsirindən istifadə etməyə inandırmağa çalışır".

İqtisadiyyat.az xəbər verir ki, bunu "Reuters" yazır.

Agentlik vurğulayır ki, Cinpinin Avropa və Çin arasında ticarət gərginliyinin artdığı bir vaxtda Fransaya iki günlük səfəri zamanı bu məqsədlərin heç birinə nail olmaq asan olmayacaq.

Yelisey sarayının müşaviri Cinpinin son beş ildə Avropaya ilk səfəri ərəfəsində agentliyə bildirib ki, Çin hakimiyyətinin ticarət məsələlərində Fransaya daha çox təminat verməsində israr etməyə davam etməlidirlər.

Çin liderinin rəsmi görüşləri arasında Makron və Avropa Komissiyasının sədri Ursula fon der Leyen ilə birgə danışıqlar olacaq.

Avropa İttifaqının 27 üzvü, xüsusən də Fransa və Almaniya arasında fikir ayrılıqları onların Çinə təsir imkanlarına mane olur.

Rəsmilər bildiriblər ki, Fransa, həmçinin Çin bazarını kənd təsərrüfatı məhsullarının ixracı üçün açmaqda irəliləyiş əldə etməyə və fransız kosmetika sənayesi ilə əqli mülkiyyət hüquqları ilə bağlı problemləri həll etməyə çalışacaq.