Daşkənd Kimya Texnolgiya Universitetinin rektoru ADNSU-da - FOTOLAR

Mayın 3-də Azərbaycan Dövlət Neft və Sənaye Universitetinin (ADNSU) rektoru, dosent Vazeh Əskərov Özbəkistanın Daşkənd Kimya Texnolgiya Universitetinin (ÖKTU) rektoru, professor Botır Usmonovun rəhbərlik etdiyi nümayəndə heyəti- prorektor Anvar Şernaev və rektorun müşaviri Ruslan İmanzadə ilə görüşüb. 

"Unikal" xəbər verir ki, qonaqları universitetdə salamlayan rektor, dosent Vazeh Əskərov ADNSU-da tədris olunan ixtisaslar, beynəlxalq əlaqələr, ikili diplom proqramları, universitetin maddi-texniki bazası haqqında ətraflı məlumat verib, təhsil ocağının tarixi və inkişafı ilə bağlı mühüm məqamları diqqətə çatdırıb. 

ÖKTU-nun rektoru, professor Botır Usmonov ADNSU-da olmaqdan məmnun olduğunu deyib və qonaqpərvərliyə görə təşəkkürünü bildirərək təmsil etdiyi ali təhsil müəssisəsi haqqında ətraflı məlumat verib.

Kimya texnologiyaları, neft-qaz mühəndisliyi, alternativ enerji və yaşıl enerji sahələrində birgə əməkdaşlığın inkişafının daha da genişləndirilməsinin müzakirə olunduğu görüşdə kadr hazırlığı, tələbə və müəllim mübadiləsi, həmçinin birgə elmi-tədqiqatların, yaşıl enerji layihələrinin aparılması yönündə görülə biləcək işlərdən danışılıb, hər iki tərəf birgə əməkdaşlıqda maraqlı olduqlarını qeyd edib. 

Sonda xatirə hədiyyələri təqdim edilib.

Qonaqlar həmçinin, ADNSU-nun laboratoriyalarına baş çəkib, tədris prosesi ilə yaxından tanış olubar.