Avropa İttifaqının maliyyələşdirdiyi “Vaksinasiyaya Dəstək” layihəsi çərçivəsində Ümumdünya Səhiyyə Təşkilatı (ÜST) Azərbaycan Respublikası Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB) ilə birlikdə Azərbaycanda Avropa İmmunlaşdırma Həftəsi və Genişləndirilmiş İmmunizasiya Proqramının 50 illiyinin qeyd olunması münasibətilə silsilə tədbirlər keçirməyə başlayıb. Bu barədə ÜST-nın Azərbaycan nümayəndəliyindən XQ-yə bildiriblər.
Qeyd edilir ki, 1974-cü ildə ÜST-nin təşəbbüsü ilə yaradılmış Genişləndirilmiş İmmunizasiya Proqramı ilk gündən etibarən peyvənd kampaniyaları vasitəsilə icmaların həyati təhlükəsi olan xəstəliklərdən qorunmasında mühüm rol oynamışdır. Bu proqram hər il 5 milyona qədər insanın həyatını xilas etməklə 20-ci və 21-ci əsrlərin ən böyük ictimai səhiyyə uğurlarından birinə çevrilmişdir. Son beş onillikdə bu proqram sayəsində çiçək xəstəliyinin aradan qaldırılması və ÜST-nin Avropa Regionunda 2003-cü ildə poliomielitin eradikasiya olunması da daxil olmaqla mühüm nəticələr əldə olunmuşdur. Bundan əlavə, qızılca, məxmərək və digər yoluxucu xəstəliklərin yayılmasında əhəmiyyətli dərəcədə azalma olmuşdur.
Bu nailiyyətləri qeyd etmək və peyvəndin əhəmiyyəti haqqında məlumatlılığı artırmaq üçün Avropa İmmunlaşdırma Həftəsi çərçivəsində Azərbaycanda silsilə tədbirlər təşkil olunub. Həftə ərzində “Hər evdə TƏBİB” kampaniyası çərçivəsində yaradılmış səyyar həkim briqadaları Ağdaş rayonuna səfər ediblər. Onlar kəndləri ziyarət edərək immunizasiya və digər ilkin səhiyyə xidmətləri göstəriblər. Bakıdan dəvət olunmuş pediatrlar peyvəndlə bağlı tərəddüdü olan valideynlərlə maarifləndirici görüşlər keçirərək onları övladlarını peyvənd etməyə təşviq ediblər.
Nümayəndəlikdən, həmçinin bildiriblər ki, kampaniyadan əvvəl səyyar briqada heyətinin və icma liderlərinin bilik və bacarıqlarla təchiz olunmasını təmin etmək üçün təlimlər keçirilib.
Kampaniya boyunca əhaliyə uşaqların immunizasiyası və valideynlərin peyvənd tərəddüdü ilə bağlı suallarını cavablandırmaq məqsədilə hazırlanmış müxtəlif növ maarifləndirici materiallar təqdim olunub.
Xatırladaq ki, ölkəmizdə rutin immunlaşdırma proqramlarının gücləndirilməsi məqsədilə ÜST-nin Azərbaycan üzrə ofisi 2021-ci ilin iyun ayından etibarən Avropa İttifaqının maliyyə dəstəyi ilə üçillik Vaksinasiyaya Dəstək layihəsini həyata keçirməyə başlayıb. Layihə Aİ və ÜST-nın Azərbaycana davamlı dəstəyinin tərkib hissəsidir.
Z.BƏŞİRQIZI
XQ