Müəllimdən tələbələrə hekayələr...

“ƏDİBİN EVİNDƏN HEKAYƏLƏR”İ TƏLƏBƏLƏR SƏSLƏNDİRİRLƏR

2021-ci ilin iyun ayından etibarən “Ədibin Evi” Ədəbiyyata Dəstək Fondu Asan Radio ilə birgə “Ədibin Evindən hekayələr” layihəsini icra edir. Bu layihədə Fond Azərbaycan ədəbiyyatından sevilən hekayələri səsli şəkildə mütaliə həvəskarlarının ixtiyarına verir.

Bu ildən etibarən layihəyə Azərbaycan Dövlət Mədəniyyət və İncəsənət Universiteti (ADMİU) də qoşulub. Belə ki, “Ədibin Evi” Ədəbiyyata Dəstək Fondu və ADMİU rəhbərliyinin birgə razılığına əsasən, bu il ərzində “Ədibin Evindən hekayələr” layihəsində hekayələri universitetin tələbələri səsləndirəcəklər.

Bu günlərdə layihələrin tələbələrin yer aldığı ilk buraxılışı təqdim olunub. İlk buraxılışda ADMİU-nun III kurs tələbəsi Kənan Hüseynov Yusif Vəzir Çəmənzəminlinin “Ağsaqqal” hekayəsini səsləndirib.

“Ədibin Evi” Ədəbiyyata Dəstək Fondunun icraçı direktoru Şəfəq Mehrəliyeva layihənin yaranma məqsədi haqqında danışarkən dedi: “Məlumdur ki, bizim artıq rəqəmsal dünyada öyrənməyə vərdiş edən tam bir nəslimiz yetişib. İnternet möhtəşəm bir bilik ümmanının qaynağıdır. Demək, rəqəmsallaşma ilə maariflənmə arasında sürətlə artan əlaqəni nəzərə alaraq oxu vərdişlərimizi müvafiq şəkildə uyğunlaşdırmalıyıq. Bu məqsədlə, 2021-ci ilin iyun ayından etibarən “ASAN Radio 100 FM”lə sosial media layihəsinə başladıq. “Ədibin Evindən hekayələr” adlı oxuya həvəsləndirmə layihəsi Mir Cəlal və digər klassiklərimizin qısa hekayə janrına aid ölməz əsərlərini rəqəmsal şəkildə gənclərə təqdim edir. Peşəkar aktyorlar və tanınmış ictimai simalar tərəfindən səsləndirilən bu qısa hekayələr, eləcə də, onları ifa edənlərlə kitabın həyatımızdakı əhəmiyyəti barədə qısa müsahibələri videoçarxlar şəklində yayımlanır və internetlə ölkəmizin bütün guşələrinə əlçatan olur”.

Ş.Mehrəliyeva layihənin istiqamətinin ustad sənətkarlardan tələbələrə doğru yön almasını bu cür əsaslandırdı: “Ədibin evi” Mir Cəlal Paşayevin tələbələri Ədibə xanım Paşayeva və Təhsin Mütəllimovun səyləri nəticəsində yaradılıb. Fondun layihələrində Mir Cəlal Paşayevin tələbələrinin- Təhsin Mütəllimovun, Nizami Cəfərovun və başqalarının çox böyük rolu olur. Eləcə də bu gün onların tələbələri artıq layihələrimizdə geniş iştirak etməyə başlayıblar. Yəni bir növ, Ədibin evi müəllimdən-ustaddan tələbəsinə miras kimidir. Bu yol müəllim-tələbə əlaqələri vasitəsi ilə nəsillərdən nəsillərə ötürülür.

Bu günə kimi “Ədibin Evindən hekayələr” layihəsində ustad yazıçılarımız, aktyorlarımız, qiraətçilərimiz hekayələr səsləndirirdilər. Onların arasında Azərbaycan Dövlət Mədəniyyət və İncəsənət Universitetinin müəllimləri- İlham Namiq Kamal, Şövqi Hüseynov, Mehriban Zəki və başqaları da var. Bu dəfə isə qərar verdik ki, artıq peşəkarlar deyil, gənclər, tələbələr bu layihədə iştirak etsinlər. Təbii ki, ilk seçimimiz də Mədəniyyət və İncəsənət Universiteti oldu. Çünki bu universitet yüz ildir mədəniyyətimizə saysız-hesabsız istedadlı sənətçilər, sənətkarlar yetişdirib. İndinin tələbələri də, inanırıq ki, gələcəyin tanınmış sənətçiləri olacaqlar.

Rektor Ceyran Mahmudovaya təşəkkür edirəm ki, təklifimizi çox gözəl şəkildə qəbul etdi və bizə dəstəyini əsirgəmədi.

Bu da müəllim-tələbə kontekstinin bir nümunəsi oldu. Hekayələri əvvəl müəllimləri səsləndirirdi, indi isə tələbələri səsləndirirlər. İl boyunca “Ədibin Evindən hekayələr”i tələbələr oxuyacaqlar. Bir neçə gün öncə ilk buraxılışımız təqdim olundu və indidən böyük marağa səbəb olduğunu görürük.

Ümumiyyətlə, hesablamalarımız göstərir ki, “Ədibin Evindən hekayələr”ə geniş ictimai rəğbət var. Çünki ilk buraxılışlarımız 30 mindən çox izləyici qazandı və gün keçdikcə bu rəqəm daha da artmağa başladı. İnanıram ki, tələbələrimizin ifası da cəmiyyətimizdə bu cür maraq yaradacaq və gənclərimizdə mütaliə vərdişlərinin artmasına kömək edəcək”.

Şahanə MÜŞFİQ