Rauf Cabbarovun Sumqayıtdakı qərarı Zirədə əks-səda verdi - HAKİMLƏRİN MÜHAKİMƏSİ

Hər turdan sonra hakim qərarları ilə bağlı söz-söhbət yaranmasına öyrəşmişik.

32-ci tur da bu mənada istisna olmadı. Ayxan Abbasov komandasının “Neftçi” ilə oyunun 63-cü dəqiqəsində azlıqda qalmasına laqeyd yanaşdısa (“sadəcə, elə qırmızı vərəqə almaq olmaz”), “Araz-Naxçıvan”a uduzan “Zirə”nin baş məşqçisi Rəşad Sadıqov coşdu, nə coşdu... “Bəzi klubların hakimlərlə bağlantıları aradan qalxana qədər...” – Rəşad bəy elə belə də dedi və heç kim söhbətin “Sumqayıt”dan getdiyini düşündü. Axı bir gün əvvəl Rauf Cabbarov yetərincə şübhəli qərar vermişdi.

Qəbələ - Kəpəz, İNQİLAB MƏMMƏDOV
Mövsümün əvvəlindən autsayder mövqeyində qərarlaşan komandaların ölüm-qalım mübarizəsinə şahidlik etdik. Hakim idarəçiliyi ilə bağlı hansısa mənfi fikir söyləmək çətindi. Adətən, belə görüşlər aqressivliklə emosiyaların vəhdəti nəticəsində dramatik keçir. Lakin Tovuzda lazımi dramatiklik görmədik. Heç vaxt futbolçuları cəzalandırmaqdan çəkinməyən İnqilab bəy bu dəfə də ənənəni davam etdirdi. Qaydanı pozan hər kəsi sarı vərəqəylə cəzalandıraraq, daha diqqətli olmalarını istədi. Ki, verilən qərarların haqlı olması ədalət təmsilçisinin işinə kölgə salmadı.

Zirə – Araz-Naxçıvan, CAVİD CƏLİLOV
Qəsəbə təmsilçisi çöx önəmli oyunda 3 xal qazanmağa və ikinci pillədəki yerin qorumağa çalışdı. Amma “qartallar” fürsətləri sağa-sola xərcləyərək bunu bacarmadı. Belədə çempionatdakı mövqeyini itirərək avrokuboklar uğrunda mübarizənin bir daha alovlanmasına zəmin yaratdı. Cavid Cəlilovun idarə və ya VAR hakimi kimi iştirak etdiyi əksər matçlar, adətən, narazılıq doğurur. Bu dəfə də belə oldu. Amma məşqçilərin etirazlarına haqsız da yanaşa bilmərik. Rəşad Sadıqov mətbuat konfransında da sözlərinin arxasında durdu. Elmar Baxşıyev isə bəlkə də yeni komandasıyla ilk qələbəsini qazandığı üçün bunu qabartmaq istəmədi. Oyun vaxtı Cavid bəyə yetərincə etiraz etsə də, konfransda idarəçiliyin düzgün olduğunu dedi. Elə təkcə 26 və 50-ci dəqiqələrdə topun ələ toxunmasıyla bağlı epizodlarda çalışdırıcının 4-cü hakim Nicat İsmayıllıya necə etiraz etdiyini gördük.

Neftçi - Turan Tovuz, RƏVAN HƏMZƏZADƏ
Tarixi Azərbaycan derbisi gərgin və maraqlı alındı. İlk yarıda referi qonaqların qapısına penalti təyin etdi. Videotəkrarda Bruno Qonçalveşin Yuri Matiasa qarşı aşkar kobudluğunu görmək mümkündü. 63-cü dəqiqədə baş hakim Brunoya birbaşa qırmızı vərəqə də göstərdi. Həmin epizodda müdafiəçi Höccət Haqverdiyə baş zərbəsi endirdiyi üçün qərarın haqlı olduğunu bildirmək lazımdı. Çox keçmədən Həmzəzadə yenidən “nöqtə”ni göstərdi. Bu dəfə Slavik Alxasov Andre Şinyaşikinin qarşısını kobudluqla kəsdiyindən 11 metrlik cərimə zərbəsi təyin olundu. Baş hakimin qərarları qonaq komandanın azarkeşləri tərəfindən birmənalı qarşılanmasa da, əksər qərarların doğru olduğunu söyləməliyik. Həmzəzadə və briqadası oyunu ideala yaxın idarə etdi.

Sabah – Səbail, ELÇİN MƏSİYEV
Avrokuboklara yollanmaq uğrunda mübarizənin növbəti səhnəsinə Masazırda şahidlik etdik. Belədə FİFA referisinin işi çətin ola bilərdi. Lakin o, soyuqqanlı və “mərhəmətli” idarəçiliklə yadda qaldı. Hər iki hissədə aqressiv oyun tərzinə şərait yaradan referi komandaları cəzalandırmamaq üçün əlindən gələni etdi. O, yalnız Yadin Luqasinin kubodluğuna göz yummadı ki, burda da haqlı idi. Çünki “Səbail”in futbolçusu topa yox, Ayaz Quliyevin ayaqlarına müdaxilə edərək yerə yıxdı. Ümumi fəaliyyət baxımından Məsiyevə “5” düşür. O, göstərdi ki, hakimin yersiz müdaxilələri olmayanda daha baxımlı oyun izləmək olar.

Sumqayıt – Qarabağ, RAUF CABBAROV
“Sumqayıt” avrokuboklar uğrunda mübarizədə büdrəməməliydi. Rəqibin köhnə-yeni çempion olması isə məsələni qəlizləşdirirdi. Komandaların gərgin mübarizəsi xeyli qayda pozuntusuyla müşayiət olundu. Belədə Cabbarov sarı vərəqələrlə futbolçulara yerini göstərməkdən çəkinmədi. Məhz oyunçuların cəzalandırılması baxımından ona haqq vermək mümkündü. Ümumiyyətlə, son dəqiqələrə qədər ədalət təmsilçisinin bacarığına şübhə yox idi. Lakin 90+2-ci dəqiqədə baş verən epizod fikirləri dəyişdi. Yassin Benzyanın yerinə yetirdiyi cərimə zərbəsi zamanı top Vüqar Mustafayevin əlinə dəydi. Amma Cabbarov “nöqtə”ni göstərmədi, VAR da ona təsir etmədi.