Uzun fasilədən sonra Citibank ABB-yə xətt açdı

ABŞ-ın Citibank-ı ABB-yə örtüksüz xətt açıb.

Marja-nın əldə etdiyi məlumata görə, xətt beynəlxalq ticarətin maliyyələşdirilməsi məqsədlidir. Beləliklə, uzunmüddətli fasilədən sonra ABB ilə Citibank arasında beynəlxalq ticarətin maliyyələşdirilməsi üzrə əməliyyatlar bərpa olunub. Xarici əqdlərin icrası zamanı artıq bu xəttdən istifadəyə başlanıb.

Bu barədə ABB-nin İdarə Heyətinin sədri Abbas İbrahimov özünün Facebook səhifəsində yazıb:

“Xoş bir xəbəri sizinlə bölüşmək istərdim. Dünyanın aparıcı maliyyə qurumlarından olan ABŞ bankı Citibank uzun dönəmdən sonra ilk dəfə ABB-yə beynəlxalq ticarətin maliyyələşdirilməsi məqsədli örtüksüz xətt açıb.

Artıq bu xətt çərçivəsində ilk əqd də bağlanıb, korporativ müştərilərimizdən biri 9.5 mln. ABŞ dolları məbləğində sənədli əməliyyat imkanından faydalana bilib”.

İlk əməliyyatın infrastruktur layihələrinə aid olmasının əhəmiyyətini vurğulayan Abbas İbrahimov onu da qeyd edib ki, Citibank-ın Banka açdığı böyük məbləğdə kredit xətti ölkəmizin bank sektoruna olan inamın, ABB-nin dayanıqlı maliyyə vəziyyətinin və artan nüfuzunun daha bir göstəricisidir.

Citibank kimi böyük şəbəkəyə malik bankın örtüksüz xətt açması ABB-nin müştəriləri olan şirkətlərə, sahibkarlara qlobal bazarlardan alınan məhsul və xidmətlər üzrə əqdlərin maliyyələşdirilməsində geniş imkanlar yaradır.