Bir ilin şirkəti “tender kralı”na çevrilir

Naxçıvan Dövlət Universiteti (NDU) “VNM İnvest” MMC-dən 92 238,83 manatlıq təsərrüfat malları alacaq. 

Valyuta.az xəbər verir ki, şirkət NDU-nun bununla bağlı keçirdiyi satınalma müsabiqəsinin qalibi seçilib. 

“VNM İnvest” MMC 13 mart 2023-cü ildə qeydiyyata alınıb. Nizamnamə kapitalı 10 manat olan şirkətin qanuni təmsilçisi Nağıyev Vüqar Məhəmməd oğludur. 
“VNM İnvest” MMC 1 ilin şirkəti olmasına baxmayaraq dövlət satınalmalarında fəal iştirak edir. 

Şirkət artıq fəaliyyətinin 7-ci ayında Biləsuvar Rayon Mərkəzi Xəstəxanasının keçirdiyi kotirovka sorğusunun qalibi seçilib. 

Ümumiyyətlə, “VNM İnvest” MMC 1 il ərzində toplam maliyyə dəyəri 1 180 493,27 manat olan 5 satınalma müsabiqəsinin qalibi olub. 

Müsabiqələr əsasən təsərrrüfat malları və dəftərxana ləvazimatlarının satın alınması ilə bağlı keçirilib. 

“VNM İnvest” MMC qısa müddət ərzində 1 milyonluq sifariş almasına baxmayaraq elə də populyar şirkət deyil. 

Açıq mənbələrdə şirkət haqqında heç bir məlumata rast gəlinmir. 

Şirkətin maddi-texniki bazasının hansı vəziyyətdə olduğu məlum deyil. 

Hüseyn