İran bu şərtlə ABŞ bazalarını vurmayacağına təminat verib - Abdullahiyan AÇIQLADI

Birləşmiş Millətlər Təşkilatının Təhlükəsizlik Şurasının (BMT TŞ) iclasında iştirak etmək üçün Nyu Yorka gedən İranın xarici işlər naziri Hüseyn Əmir Abdullahiyan orada İsrail-İran qarşıdurması ilə bağlı jurnalistlərin suallarını cavablandırıb.

Sfera.az Anadolu Agentliyinə istinadən xəbər verir ki, “Entekhab” saytı Abdullahiyanın açıqlamaları haqqında məlumat yayıb. 

Saytda gedən məlumata görə, İranın xarici işlər naziri İsrailə qarşı həyata keçirdikləri əməliyyatdan sonra ABŞ ilə təmas qurduqlarını deyib.

Nazir bildirib ki, İran ABŞ-yə bir şərt daxilində bölgədəki bazalarını vurmayacağı haqqında təminat verib:

“ABŞ-yə açıq şəkildə bildirdik ki, İsrailə hərbi dəstək verməyəcəkləri təqdirdə bazalarına və maraq dairəsində olan yerlərə zərbə endirməyəcəyik. ABŞ ilə təmas İsveçrənin vasitəçilyi ilə həyata keçirilib. Əməliyyatdan sonra bazar günü yerli vaxtla saat 02.30-da ABŞ-yə göndərdiyimiz mesajda bölgədəki gərginliyi genişləndirmək istəmədiyimizi çatdırdıq". 

Xatırladaq ki, İran-İsrail gərginliyi İsrailin aprelin 1-də İranın Dəməşqdəki konsulluğunun binasına hava hücumundan sonra yaranıb. Hücum zamanı İran İnqilabı Keşikçiləri Korpusunun 2-si general olmaqla ümumilikdə 7 əməkdaşı həlak olub. İran bəyan etmişdi ki, konsulluğa hücum onun ölkə ərazisinə hücum deməkdir və onlar İsrailə cavab verəcəklər. 

İran aprelin 13-də çoxlu sayda kamikadze pilotsuz uçuş aparatı (PUA), ballistik və qanadlı raketlərlə İsrailə hücum edib. İran hücum zamanı çoxlu hədəfin vurulduğunu iddia etsə də İsrail raket və PUA-ların əksəriyyətinin hava hücumundan müdafiə sistemləri ilə məhv edildiyini açıqlayıb. 

Vasif