Prokurorluğun əməkdaşı İlkin Əmrahovdan nə istəyib?

Bu barədə vəkil özünün "Feysbuk" profilində məlumat yayıb. 

"Daha əvvəl də ictimailəşdirdiyim kimi, 8 mart 2024-cü il tarixdə İlkin Əmrahov məhkəməyə gətirilən zaman polis əməkdaşları tərəfindən pis rəftara məruz qalmışdı. İlkinə qarşı baş vermiş qanunsuz hərəkətləri sosial şəbəkələrdə ictimailəşdirməklə yanaşı, Ombudsman və Azərbaycan Respublikasının Baş Prokurorluğuna şikayətlər ünvanlamışam", - deyə o bildirib. 

Vəkil deyir ki, Emil Məhərrəmov İlkin Əmrahova etikadan kənar suallar da ünvanlayıb: "Ötən həftə şikayəti araşdırmaq məqsədi ilə Bakı Şəhər Prokurorluğunun əməkdaşı Emil Məhərrəmli adlı şəxs Bakı İstintaq Təcridxanasında İlkin Əmrahovun izahatını almağa gedib və dolayı yolla İlkin Əmrahova mənim müdafiəmdən imtina etməsini, başqa vəkillə davam etməsini tövsiyə edib. Bundan əlavə, prokurorluğun əməkdaşı Emil Məhərrəmli tərəfindən İlkinə "siz kasıb ailəsiniz, atan vəkili necə tutub, vəkilin pulunu necə ödəyib? Bəlkə, vəkilin pulunu başqaları verib, bu vəkili dəqiq atan tutub?”  kimi tamamilə etikadan kənar və qanunsuz suallar ünvanlayıb".

"İlkin Əmrahov və digərlərinə qarşı zorakı hərəkətlər həmin gün mənim və digər vəkil həmkarlarımın gözü qarşısında baş verib, amma nədənsə şikayəti araşdıran Emil Məhərrəmli şahid kimi vəkilləri deyil, İkinin valideynlərinin izahatını almaq üçün dəvət edib və sözügedən şikayətlə əlaqəsi olmayan söhbətlər aparıb. İndi mən Bakı Şəhər Prokurorluğuna sual verirəm: Emil Məhərrəmli kimdir ki, mənim müdafiə etdiyim şəxsə bu kimi suallar verir və mənim hüquqi yardımla bağlı aldığım qonorarla maraqlanır?!" - Rövşanə Rəhimli vurğulayıb. 

Martın 6-da Bakıda müstəqil fəaliyyət göstərən "Toplum TV” onlayn televiziyası ilə bağlı polis əməliyyat keçirib. 

Elə həmin gün Daxili İşlər Nazirliyi açıqlama yayıb ki, daxil olmuş məlumat əsasında "Toplum TV” redaksiyasında və başqa ünvanlarda axtarış keçirilir.

İş üzrə Cinayət Məcəlləsinin 206.3.2-ci (qaçaqmalçılıq, bir qrup şəxslə əvvəlcədən əlbir olaraq törədildikdə) maddəsi ilə cinayət işi açılıb.

Əməliyyatlar çərçivəsində 10-dan çox şəxs saxlanılıb. 

Əksəriyyəti buraxılsa da, Akif Qurbanov, Müşviq Cabbarov, Əli Zeynalov, İlkin Əmrahov, Ramil Babayev cinayət məsuliyyətinə cəlb olunaraq həbs ediliblər. 

Fərid İsmayılov və Elmir Abbasov da cinayət məsuliyyətinə cəlb olunsalar da polis nəzarətinə buraxılıblar.

Martın 8-də "Toplum TV”nin təsisçisi Ələsgər Məmmədli və 3-cü Respublika Platformasının qurucu üzvü Ruslan İzzətli eyni iş üzrə saxlanılaraq cinayət məsuliyyətinə cəlb ediliblər. 

Sonradan onlar barəsində həbs qətimkan tədbiri seçilib.

"Toplum TV” bəyanat yayaraq baş verənlərin onların peşə fəaliyyətlərilə əlaqəli olduğunu bildirib və bunu müstəqil mediaya basqı kimi qiymətləndirib. 

Bir çox yerli və beynəlxalq təşkilatlar bu iş üzrə həbs edilənləri siyasi məhbus hesab edib və hakimiyyəti onları dərhal azad etməyə çağırıblar.