CASUS QALMAQALI - Rusiya səfiri Almaniya XİN-ə ÇAĞIRILDI

Aprelin 18-də Rusiyanın Berlindəki səfiri Sergey Neçayev Almaniya Xarici İşlər Nazirliyinə çağırılıb.

Musavat.com xəbər verir ki, bu barədə "Bild" nəşri mənbələrinə istinadən yazıb.

Buna səbəb Bavariyada Rusiyanın xeyrinə casusluqda şübhəli bilinən iki nəfərin saxlanılması olub.

"Xarici işlər naziri Annalena Barbok Rusiya səfirini XİN-ə çağırıb. Bu addım Bavariyada casusluqda şübhəli bilinən iki nəfərin həbsindən sonra atılıb", - deyə nəşr yazır.

Bundan əvvəl Almaniya Baş Prokurorluğu Rusiyanın xeyrinə gizli kəşfiyyat fəaliyyəti aparmaqda şübhəli bilinən iki nəfərin saxlandığını təsdiqləyib.

Rusiyanın Berlindəki səfirliyindən “İzvestiya”ya verilən məlumata görə, diplomatik nümayəndəliyə Rusiya vətəndaşlarının Almaniyada saxlanması barədə bildiriş daxil olmayıb.

Xatırladaq ki, aprelin 18-də "Der Spiegel" Almaniyada Rusiya Federasiyasının xeyrinə casusluq etdiyi iddia edilən iki nəfərin saxlanılması barədə məlumat yayıb.

Qeyd olunub ki, saxlanılanlardan biri ABŞ-ın Almaniyadakı hərbi obyektlərini araşdırıb və fotoşəkillərini çəkib

Musavat.com