Qubadakı “Günbəzli hamam” turistlərin ən çox diqqətini çəkən tarixi abidələrdəndir

Quba, 18 aprel, Elxan Yusifli, AZƏRTAC

Quba şəhərindəki “Günbəzli hamam” bölgəyə gələn xarici turistlərin ən çox diqqətini çəkən tarixi abidələrdəndir. XVIII-XIX əsrlərə aid abidə Şərq memarlığının incilərindən sayılır.

AZƏRTAC-ın bölgə müxbiri xəbər verir ki, bu barədə tarixi abidənin qarşısında 18 Aprel - Beynəlxalq Abidələr və Tarixi Yerlər Günü münasibətilə təşkil olunan tədbirdə bildirilib.

“Günbəzli hamam” el arasında “Çuxur hamam”, “Bəkir hamamı”, “Məşədi Əlimərdan hamamı” kimi də tanınır.

Hamam Quba şəhərinin mərkəzində, Musabəyov və Ərdəbil küçələrinin kəsişməsində yerləşir. 1985-ci ilə kimi təyinatına uyğun istifadə olunub. Sonra kanalizasiya xətti tutulduğundan fəaliyyətini dayandırıb.

Mədəni İrsin Qorunması, İnkişafı və Bərpası üzrə Dövlət Xidmətinin Şabran Regional İdarəsinin aparıcı məsləhətçisi Şamil Əhmədov bildirib ki, 1986-1987-ci illərdə hamamda təmir-bərpa işləri aparılıb. 2018-ci ildə isə “Günbəzli hamam” xarici görünüşündə dəyişiklik edilmədən yenidən əsaslı bərpa olunub.

Qırmızı kərpicdən inşa olunduğundan qubalılar bu hamama “Qırmızı hamam” da deyirlər. Hamamın içərisində milli ornamentlərdən xüsusi ustalıqla istifadə edilib.

“Günbəzli hamam” ümumi zalından başqa, bəylər üçün nəzərdə tutulan dörd, istirahət və çay içmək üçün daha üç otaqdan ibarətdir. Böyük və kiçik olmaqla, iki tağdan ibarət birmərtəbəli hamamın 1 qapısı, 6 pəncərəsi var. Hamamın qızdırılmasında odundan istifadə olunub. Sobadan hamamın döşəməsi boyunca istiliyə davamlı kərpicdən kanallar çəkilib. Bununla da sobadan çıxan istilik həm də döşəməni qızdırıb.

“Günbəzli hamam” Mədəni İrsin Qorunması, İnkişafı və Bərpası üzrə Dövlət Xidməti tərəfindən yerli əhəmiyyətli tarixi abidə kimi qorunur.

Beynəlxalq Abidələr və Tarixi Yerlər Günü münasibətilə təşkil olunan tədbirdə Quba Rayon İcra Hakimiyyəti başçısının müavini Səidə Abasova, Mədəni İrsin Qorunması, İnkişafı və Bərpası üzrə Dövlət Xidmətinin Şabran Regional İdarəsinin rəisi Yaqub Yaqubov çıxış edərək, dövlətimizin mədəni irsimizin qorunmasını istiqamətində atdığı addımlardan danışıblar. Bildirilib ki, ictimaiyyətin diqqətini ətraf mühitin mühafizəsinə, tarix və mədəniyyət abidələrinin qorunmasına, habelə təbliği işinə yönəltmək üçün Beynəlxalq Abidələr və Tarixi Yerlər Günü çərçivəsində ölkə ərazisində 29 tarix və mədəniyyət abidəsində ziyarətlər təşkil olunub.

Tədbirdən sonra iştirakçılar “Günbəzli hamam”la yaxından tanış olub, unikal tarixi abidə haqqında ətraflı məlumat alıblar.