“ABŞ-nin Ukraynaya ümumi yardımı 113 milyard dolları ötür” – Fox

ABŞ-nin Ukraynaya yardım üçün ayırdığı vəsaitin ümumi məbləği azı 113 milyard dollar təşkil edib.
Yeniavaz.com xəbər verir ki, bu barədə “Fox News” kanalı Ağ Evin İdarəetmə və Büdcə İdarəsinin rəhbəri Şalanda Yanqın məktubuna istinadən məlumat yayıb.
Məlumata görə, senator Ceyms Devid Vensin (Respublikaçı, Ohayo ştatı) sorğusuna cavab olaraq göndərilən sənədə görə, Ukraynada müharibə başlayandan bəri ABŞ Konqresi Kiyevə 111 milyard dollar əlavə maliyyə vəsaiti ayırıb. Daha 2,4 milyard dollar məqsədli olmayan fondlardan Ukraynanın xeyrinə yenidən bölüşdürülüb.
İdarənin məlumatına görə, əsas yardım paketlərinə əlavə olaraq, Dövlət Departamenti və ABŞ Beynəlxalq İnkişaf Agentliyi (USAID) 2022 və 2023-cü maliyyə illərində səhiyyə və səfirlik əməliyyatları üçün müvafiq olaraq 145 milyon və 189 milyon dollar ayırıb.
Telekanalın məlumatına görə, silah və sursatların dəyişdirilməsi xərcləri də nəzərə alınsa, ümumi xərclər daha yüksək ola bilər.
Qeyd edək ki, Amerika administrasiyası daha əvvəl Konqresə oktyabrın 1-də ABŞ-da başlayan 2024-cü maliyyə ilində ilk növbədə İsrail və Ukraynaya kömək etmək üçün müraciət göndərmişdi. Bu müraciətə görə, ümumilikdə, Prezident Co Baydenin rəhbərlik etdiyi administrasiya bu məqsədlər üçün təxminən 106 milyard dollar almaq istəyir. Ancaq müraciətin və alternativ qanun layihələrinin sonrakı taleyi qeyri-müəyyən olaraq qalır.