Britaniyanın "Arm" şirkəti "Qualcomm"a çiplərin hazırlanması üçün əqli mülkiyyətindən istifadə etmək üçün lisenziyanın ləğvi barədə bildiriş göndərib.
Valyuta.az xəbər verir ki, bu barədə "Bloomberg" məlumat yayıb.
"Qualcomm" hər il əksər "Android" smartfonlarını gücləndirən yüz milyonlarla prosessor satır və lisenziyanın itirilməsi şirkəti məhsul satışını dayandırmağa və ya məhkəmələrlə üzləşməyə məcbur edə bilər.
Bu, 2022-ci ildə "Arm"ın müqavilə və ticarət nişanı hüquqlarını pozduğuna görə "Qualcomm"a qarşı iddia qaldırdığı zaman başlayan hüquqi münaqişəyə əlavə olunur. Mübahisə "Qualcomm"un 2021-ci ildə "Arm" lisenziyasına sahib startap "Nuvia"nı almasından qaynaqlanır. "Qualcomm" nümayəndəsi Britaniya şirkətini tərəfdaşına təzyiq göstərməkdə ittiham edərək, lisenziyanın ləğvi tələbini əsassız adlandırıb.
"Nuvia" çipləri "Qualcomm"un HP və "Microsoft" kimi şirkətlərə satdığı yeni PC prosessorları üçün əsasdır. Onlar AI noutbuklarının yeni xəttində istifadə olunur. Bundan əlavə, "Qualcomm" smartfonlar üçün "Snapdragon" çiplərində "Nuvia"nın "Oryon" adlı dizaynından istifadə etməyi planlaşdırır.
"Arm" "Qualcomm"un lisenziya müqavilələrini pozduğunu iddia edir və startapın alınmasından əvvəl yaradılmış "Nuvia" dizaynlarından istifadəni dayandırmağı tələb edir. Lisenziya ləğv edilərsə, "Qualcomm" "Arm"ın təlimatlarından istifadə edərək öz dizaynlarını inkişaf etdirə bilməyəcək, baxmayaraq ki, o, dizaynları ayrıca müqavilələr əsasında lisenziyalaşdıra biləcək və bu da öz növbəsində gecikmələrə səbəb olacaq.
Paşa Məmmədli
