Astana, 4 oktyabr, AZƏRTAC
Almatıda daxili xəstəliklər üzrə mütəxəssislərinin Birinci Milli Konqresi keçirilir.
AZƏRTAC Qazaxıstan Respublikasının Səhiyyə Nazirliyinə istinadla xəbər verir ki, tədbir bir sıra ölkələrdən, o cümlədən Azərbaycandan daxili xəstəliklərin müxtəlif istiqamətləri üzrə mütəxəssisləri bir araya gətirib.
Konqresdə həm onlayn, həm də offlayn rejimində 3300-dən çox mütəxəssis iştirak edir. İştirakçılar arasında Qazaxıstanın bütün bölgələrindən terapevtlər, ümumi təcrübə həkimləri, endokrinoloqlar, kardioloqlar, nevroloqlar, pulmonoloqlar, qastroenteroloqlar və digər mütəxəssislər var.
Konqresin əsas məqsədi daxili xəstəliklərin aktual istiqamətlərində təcrübə mübadiləsinin aparılması, diaqnostika və müalicədə qlobal tendensiyaların müzakirə edilməsidir.
Proqram çərçivəsində beynəlxalq ekspertlərin çıxışları, panel diskussiyalar və təcrübə sessiyaları nəzərdə tutulub.
Mütəxəssislər fənlərarası qarşılıqlı əlaqə məsələlərini və xəstəliklərin müalicəsinə yanaşmaları müzakirə edirlər, bu isə qabaqcıl metodları yerli həkimlərin təcrübəsində tətbiq etməyə imkan verəcək.
Elşən Rüstəmov
AZƏRTAC-ın xüsusi müxbiri
Astana
