Putin yenə nüvə silahı ilə hədələdi

Yayımlandı: 26 Sentyabr 2024 00:16 “Rusiya və Belarusa qarşı təcavüz halında Moskva nüvə silahından istifadə etmək hüququnu özündə saxlayır” Rusiya prezidenti Vladimir Putin nüvə doktrinasına dəyişikliklər təklif edib. Bu barədə sentyabrın 25-də Rusiyanın dövlət başçısı Təhlükəsizlik Şurasının nüvə silahından çəkindirmə üzrə daimi iclasında danışıb. Vladimir Putin Rusiya və Belarusa qarşı təcavüz halında Moskvanın nüvə silahından istifadə etmək hüququnu özündə saxladığını bildirib. “Rusiyanın suverenliyinə adi silahlarla belə kritik təhlükə nüvə cavabına zəmin yaradacaq” – Putin belə deyib.  Sentyabrın 1-də ölkənin xarici işlər nazirinin müavini Sergey Ryabkov bildirib ki, Rusiya nüvə doktrinasını dəyişəcək. Nazir müavininin sözlərinə görə, bu, xüsusi hərbi əməliyyat (SVO) ilə bağlı münaqişələrin və Qərbin hərəkətlərinin təhlili əsasında baş verəcək. İyun ayında Vladimir Putin nüvə doktrinasında dəyişikliyə icazə verib. Kreml Rusiyanın nüvə doktrinasının yenilənməsini Qərbin hərəkətləri nəticəsində formalaşan mövcud gündəmlə izah edib. Daha əvvəl Rusiya Təhlükəsizlik Şurasının sədr müavini Dmitri Medvedev bildirib ki, Rusiya düşmənin hərəkətlərinə cavab olaraq nüvə silahından istifadə etmir, çünki o, belə bir münaqişənin təhlükəsini və dönməzliyini anlayır: “İndiyədək Moskva səbrli olub, amma bu səbr bitə bilər”. Meydan TV