"Zakir Fərəcovun yalanlarından bezmişik" - Sahibkarlar Prezidentdən və Birinci Vitse-Prezidentdən kömək istəyir

Bir qrup iş adamı Sumqayıt Şəhər İcra Hakimiyyətinin (ŞİH) başçısı Zakir Fərəcov və qurumun Ərazi idarəetmə və yerli özünüidarəetmə orqanları ilə iş şöbəsinin müdiri Gündüz Əliyevin onlara olan külli miqadarda borclarını qaytarmamaları ilə bağlı Prezident İlham Əliyevə və Birinci vitse-prezident Mehriban Əliyevaya müraciət ünvanlayıblar.

 

Müraciəti olduğu kimi təqdim edirik:

 

 

 

 

Sumqayıt şəhər İcra Hakimiyyətinin başçısı Zakir Fərəcovun dəvəti ilə onun qəbulunda oldum. Mənə Sumqayıt şəhərində yeni bulvarın kompleksinin salınmasının zəruriliyini bildirdi. Söhbət əsasında başçı mənə demişdir ki, Sumqayıtda Yeni Bulvar kompleksinin salınmasını və bulvarın cari ilin sentyabr ayında təhvil verilməsini tapırmışdır. Tapşırılan vaxtda Yeni Bulvar kompleksini keyfiyyətli təhvil verəndən sonra yüksək vəzifəyə təyin ediləcəkdir. Həmçinin, mənə bildirdi ki, əvvəlcədən 6 nəfər iş adamı ilə bu barədə söhbəti olub, lakin onlar bu işi boyunlarına götürməyiblər. İşi görmək üçün arayıb məni tapıb. Bunu ancaq mənim edə biləcəyim qənaətinə gəlmişdir, xahiş etdi ki, bu işi boynuma götürüm. Yeni bulvarın salınması onun üçün olduqca vacibdir. Ona görə ki, bulvarı yüksək keyfiyyətlə salınması barədə Prezidentə söz verib. Xeyli söhbətdən sonra mən yeni bulvar kompleksini yarada biləcəyimi bildirdim. Zakir Fərəcov bildirdi ki, bu işi vaxtında yerinə yetirə bilsəm, yüksək vəzifəyə təyin edildikdən sonra mənə işləmək üçün hər cür şərait yaradacağına söz də verdi. Bundan sonra, birlikdə yeni bulvar kompleksinin salınacağı yerə getdik. Həmin sahəyə baxış keçirdik, 105 ha torpaq sahəsində yeni bulvar kompleksinin salınmasına və sentyabr ayının axırında tam təhvil vermək barədə razılaşdıq. Həmçinin, Z.Fərəcov mənə şəhərin Bakı-Quba yolundan girişində abadlıq işləri aparılmasını da mənə tapşırdı və bu barədə də razılığa gəldik. Bundan sonra, mən 624 nəfər işçilərimlə və texnikamızla birlikdə mart ayının 10-da işə başladıq. Yeni Bulvar kompleksini 2016-cı ilin sentyabr ayında söz verdiyim kimi, tam təhvil verdim. Lakin, gördüyümüz işlərin dəyəri bu günə qədər rəhbəri olduğum cəmiyyətə tam ödənilməmişdir. 

 

Bildirmək istəyirəm ki, Yeni Bulvar kompleksindən sonra Şəhidlər Xiyabanı və Heydər Əliyev prospekti, Sumqayıt şəhərinin girişində yolun sağ və sol hissəsi (8 km), S.Vurğun, Nizami və C.Cabbarlı küçələri, Sumqayıt şəhərində Muğanbankın qarşısındakı istirahət parkını tam abadlaşdıraraq təhvil verilmişdir. Lakin öhdəmizə götürdüyümüz işləri başa çatdıraraq təhvil verilməyinə baxmayaraq indiyə qədər borclu qaldığı 2.900.000 manat vəsait hələ də ödənilməmişdir. Dəfələrlə etdiyim müraciətlər nəticə verməmişdir. 

 

Möhtərəm Prezidenti Sumqayıt şəhərində Z.Fərəcov təmsil edir. Z.Fərəcova etibar göstərilərək bu vəzifəyə təyin edilmişdir. Mən ölkə rəhbərinin etibar etdiyi şəxsə, onun sözlərinə inanıb etibar etdim. İnana bilməzdim ki, Z.Fərəcov etibarsızlıq edib şəhər üçün, ölkə üçün görülən işlərin pulunu mənimsəyib verməyəcək. 

Biz Z.Fərəcovun sözlərinə inanaraq təmir-tikinti və yenidən qurma işləri ilə əlaqədar lazım olan avadanlıq və tikinti materiallarını tanıdığım iş adamlarına sifariş etdik. Onların dəstəyi ilə bütün məhsulları alaraq tapşırılan işləri yüksək səviyyədə yerinə yetirdik.

 

İşlərin görüldüyü zaman əvvəllər veriləcək pullar bizə şəhərin memarı Adil Xudadatov tərəfindən nağd şəkildə ödənilirdi. Adil Xudadatovla aramızda yaranan münasibət nəticəsində onun tərəfindən mənə məlum olmuşdur ki, verilən pullar şəhərdə fəaliyyət göstərən iş adamlarından və müxtəlif təşkilatlardan yığılıb verilirdi. Çünki, mən material üçün pul lazım olduğunu bildirdikdə deyirdi ki, hələ pul yığılmayıb, yığılan kimi çatdıracağam. Mən işlərin dayanmamasına görə tanınmış iş adamı olduğum üçün tanışlarımdan nisyə tikinti materialları alırdım. Kompleksin tikintisində çalışan işçilərin əmək haqlarını daxili imkandan və münasibətim olan imkanlı dost-tanışlarımdan pul almaqla ödəyirdim. Çünki, Z.Fərəcov və A.Xudadatov mənə işlərin dayandırılmamasını xahiş edir və yaxın zamanlarda pulun ödənilməsinə söz verirdilər. Hətta, işin vaxtında təhvil verilməsi üçün yalvarırdı. Qeyd etdiyim kimi, imkanlar daxilində mənə tapşırılan işi tam və keyfiyyətlə yerinə yetirdim. Buna görə müəyyən şəxslərdən götürdüyüm tikinti materiallarının dəyərini və bu işə görə borc götürdüyüm şəxlərə borcumu hələ də ödəyə bilmirəm.

Sumqayıtda Yeni Bulvar kompleksinin açılışı zamanı möhtərəm Prezident də görülən işlərdən və işin keyfiyyətlə yerinə yetirilməsindən razı qalaraq orada bildirdi ki, tez bir zamanda bu işlərin görülməsi əsl möcüzədir.

 

Prezidentin sözlərilə desək möcüzəni yaradan MMC 6 (altı) ildir ki, gördüyü işlərin dəyərini hələ də ala bilmir. Onu da bildirim ki, Z.Fərəcov deyir ki, kompleksin tikintisi üçün dövlət tərəfindən vəsait ayrılmamışdır. Bunu öz hesabına tikdirmişdir. Buna görə də bizə görülən işlərin dəyərinin 30 faizini notarial qaydada təsdiq edilməklə ona bağışlamağımızı tələb edir. Yerdə qalan hissəsinin əvəzinə də torpaq sahələri, avtomobillər, yeni tikililərdə mənzillər təklif etmişdir. Bu təklif bizi qane etməsə məcburən razılaşdıq. Lakin, həmin təkliflər də söz olaraq qaldı. Z.Fərəcov ödəniş etmək əvəzinə hələ də bizə hədə-qorxu gəlir, tutdurmaqla hədələyir. Hətta, bir necə şəxsi polisdə günlərlə qeyri-qanuni saxlatdırmışdır.

 

Yeri gəlmişkən görüşlərimiz zamanı bildirir ki, indi ona yuxarıdan öz vəsaiti ilə 6.000.000 manat dəyərində bir məktəb və bir uşaq bağçası tikilməsi tapşırılmışdır. Onların tikilməsi üçün vəsait tapa bilmir. Buna görə də MMC-yə borcunu ödəmək imkanı yoxdur. 

 

Z.Fərəcovun yalanlarından bezmişik. Bilirik ki, Yeni Bulvar kompleksinin tikintisi və şəhərin abadlaşdırılması üçün büdcədən vəsait ayrılmışdır. Lakin, həmin vəsaitlərin hara xərclənməsi naməlumdur. Bizə az da olsa ödənilən vəsait qeyd etdiyim kimi, memar Adil Xudadatov tərəfindən müxtəlif iş adamlarından və təşkilatlardan yığılan pullar hesabına ödənilmişdir. Hazırda Adil Xudadatov da ödəniş etməkdən yayınır, verdikləri sözlərə əməl etmirlər. 

 

Əldə etdiyim məlumatlara əsasən Sumqayıt şəhərində gördüyümüz yenidənqurma və abadlıq işlərini rəhbəri olduğum MMC gördüyü halda həmin işlər başçının göstərişi ilə tamamilə başqa müəsissələrin adına sənədləşdirilmişdir. Əslində gördüyümüz işlərə ayrılan pullar qeyd etdiyimiz kimi mənimsənilmişdir.

 

Bizə boclu olduqları pulların qaytarılması üçün başçı tərəfindən necə illərdir üstümüzə emissarlar göndərilir. Bu danışıqlar bəzən başçı tərəfindən hədələrdən ibarət olur. Bəzən də bizə gözləmək məsləhət olunur. Səbəb kimi də başçının bizə olan borcunu hazırda ödəmək üçün vəsaitinin olmaması göstərilir. Necə deyərlər bizim aramızda olan danışıqlar lap ATƏT-in Minsk qrupunun danışıqları kimi söhbətlərdən və görüşlərdən başqa bir şey deyildir. Nə qədər araçılarla (emissarlarla) görüşmək, danışmaq olar. 

 

Başçının borcunu ödəmək üçün pulunun olmaması isə əsassız dəlildir. Kiminsə imkanlarını, obyektlərini sadalamaq istəmirik. Sadəcə onu bildirirəm ki, başçının pulu yoxdursa Sumqayıt stansiyasında şəxsi ferma kompleksini nə ilə tikdirir? Yəni, ferma tikdirməyə pulu var, ancaq gördürdüyü işlərin zəhmət haqqını ödəməyə imkanı yoxdur. Nə qədər də gülüncdür. Hamı hər şeyi yaxşı görür və yaxşı bilir. Ortada olan və hamıya bəlli həqiqətləri gizlətmək, dəvəquşunun gizlənməsinə bənzəyər. Necə deyərlər görünən dağa bələdçi lazım deyil. 

 

Alacağımız pullar yüzlərlə fəhlənin alın tərinin puludur. İş adamlarının min bir əziyyətlə ərsəyə gətirdiyi və satdığı tikinti materiallarının puludur. Hansı ki həmin pullar yüzlərlə ailənin yeganə dolanışıq mənbəyi olmuşdur. Bizim borclu qaldığımız iş adamları özləri bu səbəbdən borc içində batırlar. Bu qədər insanları belə zillətə salmağa nə ad vermək olar. 

 

İndiyə kimi nə qədər şikayətlər yazmışam, heç bir nəticəsi olmayıb. Ancaq, inanıram ki, axırda bir dəfə kimsə dözməyib bu işə bir nöqtə qoyacaqdır. 

Z.Fərəcov çoxsaylı şikayətlərimizdən sonra borclu olduğu iş adamlarını otağına dəvət etmiş, onları 50.000 manat verərək tutduracağını bildirməklə hədələmişdir. Həmin görüşdə harınlamış Z.Fərəcov iş adamlarına demişdir ki, siz Administrasiyaya şikayətlər yazırsınız, sizin şikayətləri mənə göndərirlər mən də ərizələrinizi ayaqyolunda istifadə edirib atıram. 

 

Z.Fərəcov bizə xəbər göndərir ki, Baş prokurorluq məni çox sıxır, onlarla münasibətim tamamilə korlanıb. Bunun səbəbi də sizin ərizələrinizdir. Ona görə komissiyanın iştirakı ilə siz borcun ödənilməsi barədə notarial qaydada ərizə yazın prokurorluğa verim. Sonra danışaraq sizin borcu hissə-hissə ödəyim. Yəni, Z.Fərəcov yenə də özünü ağıllı hesab edib bizi tələyə salmaq istəyir. 

 

Bizə belə xəbərlər göndərməsinə baxmayaraq özü ayrı-ayrı yerlərdə borcunu tam ödəməsi barədə məlumatlar yayır. Lakin məlum edirəm ki, Zakir Fərəcov və Adil Xudadatov bizə yalvararaq borcların ödənilməsi barədə bizdən ərizə almışlar ki, bizi çox sıxırlar. Siz borcun ödənilməsi barədə ərizə yazın, rahat işləyib sizə borcu tam ödəyək. Çarəsiz qalaraq borc pulun ödənilməsi məqsədilə belə ərizə yazmışıq. Lakin borc hələ də borc ödənilməmiş qalmışdır. Belə hərəkətlərlə həm bizləri və aidiyyəti təşkilatları da aldadırlar. Onların bu hərəkətlərinə ad tapa bilmirəm.