Bakıda bir neçə vətəndaşa qarşı dələduzluq etməkdə təqsirləndirilən Eldəniz Rzayevin barəsindəki hökmdən verilən apellyasiya şikayətində imtina edilməsinin bəzi detalları məlum olub.
Pravda.az-ın əldə etdiyi məlumata görə, Bakı Apellyasiya Məhkəməsinin hakimi İbrahim İbrahimlinin sədrliyi ilə keçirilən prosesdə elan edilib ki, təqsirləndirilən şəxsin müdafiəçilərindən biri hökmündən narazı qaldığı üçün apellyasiya şikayəti verərək, Eldəniz Rzayevin əməlinin Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsindən, həmin Məcəllənin 178.2.4-cü (dələduzluq, xeyli miqdarda ziyan vurmaqla törədildikdə) maddəsinə tövsif edilməsini, habelə həmin maddə üzrə təqsirli bilinməsini və ziyanın bir hissəsinin ödənilməsini, səmimi peşmançılıq, ibtidai istintaqa kömək etməsini, cinayətin digər iştirakçılarının aşkar edilməsinə köməklik göstərməsini nəzərə alaraq azadlıqdan məhrumetmə ilə əlaqədar olmayan cəza verilməsini xahiş edib.
İlkin apellyasiya baxışı zamanı məhkum təqsirləndirilən şəxs məhkəmə kollegiyasına ərizə təqdim edərək, mübahisələndirilən hökmdən müdafiəçisi tərəfindən verilən apellyasiya şikayətindən imtina etdiyini göstərib. O, apellyasiya şikayətinə baxılmasına xitam verilməsini istəyib. Proses iştirakçıları məhkumun apellyasiya şikayətindən imtina etməsinin onun hüququ olduğunu və Eldəniz Rzayevin ərizəsinin təmin edilib apellyasiya şikayətinə baxılmasına xitam verilməsi barədə ərizəsinin təmin edilməsinə etiraz etmədiyini bildirib.
Qərara əsasən, apellyasiya şikayətinə baxılmasına xitam verilib.
Qeyd: E.Rzayev barəsində Cinayət Məcəlləsinin 178.3.2-ci (Külli miqdarda dələduzluq) maddəsi ilə ittiham irəli sürülüb.
Araşdırmalar zamanı müəyyən edilib ki, E.Rzayev Bakıda bıçaqlanma hadisəsinə görə həbs edilmiş şəxsi azadlığa buraxdıracağı vədi ilə onun yaxınlarından 16 500 manat pul alıb. Bundan sonra E.Rzayev yüksək vəzifələrdə işləyən tanışlarının vasitəsilə Məmmədov Məhəmməd Cəbrayıl oğluna işlədiyi “Azərsun” Holdinqin nəzdində olan “İmişli Şəkər” zavodunda 268 000 manatlıq mənimsəmə faktına görə barəsində Korrupsiyaya qarşı Mübarizə Baş İdarəsində Cinayət Məcəlləsinin 179, 308 və 314-cü maddələri ilə istintaq olunan cinayət işinin icraatına xitam verdirəcəyini deyib. O, zərərçəkmiş hüquqi şəxsə maddi ziyanın ödənilməsinə köməklik göstərəcəyinə dair yalan vəd verməklə, “Ayna Sultanova” heykəlinin yaxınlığında 60 000 manat, bundan bir neçə gün sonra vahid niyyətin davamı olaraq Məhəmməd Məmmədovun Rüstəm Məhərrəmov vasitəsilə göndərdiyi 15 000 manat pulu ələ keçirib və qarşı tərəfə 75 000 manat ziyan vurmaqla dələduzluq edib. E.Rzayev ziyan vurduğu şəxslərə özünü Ədliyyə Nazirliyində işləyən yüksəkvəzifəli şəxsin qohumu, eyni zamanda Səudiyyə Ərəbistanı Krallığının Azərbaycanda yerləşən səfirliyində tərcüməçi vəzifəsində işləyən şəxs kimi təqdim edib. Həmçinin məlum olub ki, Eldəniz Rzayev illər əvvəl başqa şəxslərə qarşı da oxşar əməllər törədib və məhkum edilib.
Bakı Ağır Cinayətlər Məhkəməsinin hökmlü E.Rzayevə 7 il 6 ay həbs cəzası verilib və ciddi rejimli cəzaçəkmə müəssisəsinə göndərilib.
Kamal Məmmədov
