Yeni qərar qüvvəyə mindi
Neqativ halların qarşısı alınacaq!
Dünəndən etibarən çağırışçıların müddətli həqiqi hərbi xidmətə yola salınmasına başlanılıb. Bundan başqa, hərbi xidmətə çağırışla bağlı yeni qərar da qüvvəyə minib. Proses iyulun 30-da bitəcək.
Məlumdur ki, 2023-cü ildə Prezident İlham Əliyevin imzaladığı fərmana əsasən, hərbi xidmətə çağırışla bağlı yeni qaydalar müəyyənləşib. Fərmanda qeyd olunmuşdu ki, həmin qaydalar iyulun 1-dən qüvvəyə minəcək.
Hazırki qaydalara əsasən, hərbi xidmətə çağırılan çağırışçılar ilkin olaraq hərbi komissarlıqlarda müayinədən keçirilir, digər zəruri hallarda isə müalicə müəssisələrində müqayinədən keçirdilər. Yəni nəticə olaraq şəxsin hərbi xidmətə yararlı olub-olmaması ilə bağlı Səfərbərlik və Hərbi Xidmətə Çağırış üzrə Dövlət Xidmətinin nəzdində olan hərbi həkim komissiya qərar verirdi.
Ancaq Səfərbərlik xidmətinin hərbi həkim komissiyası daha bu qərarı verə bilməyəcək. Həmin yekun tibbi müayinə Nazirliyin tabeliyində Dövlət Tibbi-Sosial Ekspertiza və Reabilitasiya Agentliyi tərəfindən hərbi həkim komissiyalarının tibbi müayinə nəticələri və müddətli həqiqi hərbi xidmətə çağırılan vətəndaşların əyani tibbi müayinəsi əsasında aparılacaq.
Qeyd edək ki, ötən dövr ərzində Səfərbərlik və Hərbi Xidmətə Çağırış üzrə Dövlət Xidmətində islahatlar aparılır. Hərbi xidmətə çağırışdan boyun qaçırma hallarına qarşı Baş Prokurorluq tərəfindən mütəmadi olaraq müvafiq dövlət qurumları ilə birgə mübarizə davam etdirilir.
Məsələ ilə bağlı “Yeni Azərbaycan”a açıqlama verən hərbi ekspert Ədalət Verdiyev bildirib ki, yeni qərar hərbi xidmətdə bir sıra neqativ halların qarşısını alacaq. Ekspertin sözlərinə görə, rayon və şəhər çağırış şöbələri, kommisiyaları heç bir halda təkbaşına hərbi çağrış yaşına çatmış vətəndaşlara yaralılıq və möhlətlə bağlı qərar verə bilməyəcək: “Bu, silahlı qüvvələrimizin hərbi xidmətə yararlı və sağlam heyyətlə təmin olunması baxımından çox mühüm rol oynayacaq. Daha əvvəlki illərdə “yararsız” hesab edilən 100-lərlə çağrışçı artıq bu gün ordu sıralarında xidmət edirlər. Keçən çağrışda onların sayı təxminən 500-dən artıq idi və aralarında 30-32 yaşından yuxarı olan vətəndaşlarımız da mövcud idi. Digər tərəfdən isə əvvəlki illərdə mövcud olan neqativ hallar barədə son zamanlar həm Baş Prokurorluq, həm də səfərbərlik xidməti tərəfindən kifayət qədər ciddi məlumatlar dərc olunur”.
Ekspert ƏƏSMN-ə böyük ümidlərin olduğunu söyləyib: “Hərbi xidmətə çağırışla bağlı 4 kateqoriya var: yararlı, məhdud yararlı, sülh dövründə və müharibə dövründə yararlı. Bütün bu yararlılıq dərəcələrini Əmək və Əhalinin Sosial Müdafiəsi Nazirliyi (ƏƏSMN) təyin edəcək. Nazirliyin tabeliyindəki Dövlət Tibbi Sosial Ekspertiza və Reabilitasiya Agentliyi bu prosesdə daha obyektiv olacaq”.
Yeganə BAYRAMOVA
