Dünya yaranışından Xeyir və Şərin mübarizəsinə şahidlik edir. Xeyir və Şər anlayışı həmişə diskussiya mövzusu olub. Onların mübarizəsini əbədi hesab edənlər də var, bu mübarizənin nə zamansa Xeyirin qələbəsi ilə bitəcəyinə inananlar da. Hətta “Xeyirlə Şər qardaşdır” deyənlər də var. Bütün bunlar fəlsəfi beyin fırtınası zəminində irəli sürülən qavrayışlarla bağlı mücərrəd iddialardır. Real həyatda isə Xeyir də, Şər də göz qabağındadır. Əslində həyata doğulan hər bir bəşər övladı təbii şəkildə xislətində Xeyir və Şər əməllərin başlanğıcını daşıyır.
Publika.az xəbər verir ki, bunu Milli Məclisinin deputatı Cavanşir Feyziyev deyib.
Deputat qeyd edib ki, hər bir insan oğlu onu əhatə edən Xeyir və Şərin təsir dairəsində formalaşır. Mənliyin, kişiliyin, insanlığın formalaşması prosesində övlad ətrafındakı Xeyir və Şər daşıyıcılarının (ilk növbədə Ata və Ana) malik olduğu xeyir və ya şər üstünlüklərindən qidalanır. Bu prosesdə özünü dərk etməyə, Xeyiri və Şəri fərqləndirməyə və düzgün dəyərləndirməyə nail olan şəxs şüurlu şəkildə öz xislətindəki Şər başlanğıcının “klapanını” birdəfəlik bağlayır və həmişə Şər əməllərdən uzaq olur. Yəni onların cismi, beyni, qəlbi artıq şər yox, yalnız xeyirli düşüncələrlə və əməllərlə çalışır. Hansı övlad özünü Kainatın bir zərrəsi olan bəşər övladı kimi dərk edə bilmirsə, sadəcə ətrafındakıların ( yenə də ilk növbədə Atanın və Ananın) əməllərini təkrar edərək yaşayır. Bu əlamətlərinə görə hamının bir-bir Xeyir və ya Şər daşıyıcısı olduğunu müəyyən etmək o qədər də çətin deyil. Xeyir həmişə və hamıya xeyirlidir. Şər isə həmişə hamının başına bəladır. Belə bəlalardan biri haqqında danışmaq istəyirəm. Bu bəlanın adı Cəmil Həsənlidir.
C.Feyziyev bildirib ki, buqələmun kimi yerindən və zamanından asılı olaraq dəfələrlə rəngini dəyişən və yeniləşən Cəmil Həsənli bu dəfə özünün sosial şəbəkə səhifəsində hüquqşünas obrazında zühur edib. Növbədənkənar seçkilərin qanunauyğunluğunu təsdiq etmiş Konstitusiya Məhkəməsinin qərarı ilə razılaşmayan Şər Mələyi indi də öz “hüquq biliklərini” nümayiş etdirmək qərarına gəlib. Bununla kifayətlənməyən Cəmil Həsənli başqa bir hüquqi məsələdə istintaq orqanlarını da hədəfə alıb. Xarici xüsusi xidmət orqanları tərəfindən maliyyələşməklə ölkədə sabitliyi pozmaq istiqamətində fəaliyyət göstərdiyi ehtimal olunan bir şəxsin günahsız olduğunu iddia edən Cəmil Həsənli istintaqdan əvvəl artıq öz qərarını elan edib. “Ali savadlı” bir şəxs kimi belə verdiktlərin yalnız istintaq və məhkəmə orqanları tərəfindən verilməli olduğunu bilərək belə bir iddia ilə çıxış etməsi Cəmil Həsənlinin özünün sabitlikdən o qədər də xoşlanmadığını göstərir.
