Bu gün saat 10:00-a olan məlumata əsasən ölkə ərazisində qeyri-sabit, küləkli, yağıntılı hava şəraiti müşahidə olunub.
Milli Hidrometeorologiya Xidmətindən Sabah.az-a verilən məlumata görə, bəzi yerlərdə leysan xarakterli yağış yağıb, şimşək çaxıb. Ayrı-ayrı yerlərdə yağıntılar intensiv və güclü olub. Şimal-qərb küləyi bəzi yerlərdə arabir güclənib.
Düşən yağıntının miqdarı Bakıda və Abşeron yarımadasında 9 mm-dək (aylıq normanın 90 faizi), Lənkəran-Astara zonasında 45-83% (aylıq normanın 102-182 faizi), Dağlıq Şirvan bölgəsində 10-47 mm (aylıq normanın 80-104 faizi), Balakən-Şəki bölgəsində 17-45 mm (aylıq normanın 40-72 faizi), Qazax-Gəncə bölgəsində 10-31 mm (aylıq normanın 25 faizi), Mərkəzi aran rayonlarında 34 mm-dək (aylıq normanın 78-131 faizi), Quba-Qusar bölgəsində 31 mm-dək (aylıq normanın 62 faizi), Qarabağ və Şərqi Zəngəzur bölgəsində 12 mm, Naxçıvan MR-da isə 10 mm-dək olub.
Yağan intensiv yağışlar nəticəsində iyunun 27-də gecə saatlarında Astara rayonu ərazisindən axan Təngərüdçaydan, səhər saatlarında isə Şabran rayonu ərazisindən axan Gilgilçaydan, Qobustan rayonu ərazisindən axan Pirsaatçaydan sel keçir.
Ölkə ərazisində iyunun 26-da müşahidə olunan güclü şimal-qərb küləyi səhər saatlarından zəifləyib. İyunun 27-gündüz və 28-də ölkə ərazisində hava şəraitinin sabitləşəcəyi, gün ərzində əsasən yağmursuz keçəcəyi gözlənilir. Lakin gündüz saatlarında bəzi dağlıq və dağətəyi rayonlarda qısamüddətli yağış yağacağı, şimşək çaxacağı, dolu düşəcəyi ehtimalı var. Mülayim cənub-şərq küləyi əsəcək.
