Xırdalan, 21 iyun, AZƏRTAC
Bakı Mühəndislik Universitetində (BMU) cari tədris ilinin yaz semestrinin yay imtahan sessiyası davam edir.
BMU-dan AZƏRTAC-a bildirilib ki, indiyədək keçirilmiş 1097 imtahanda ümumilikdə 3600 tələbə iştirak edib. Qış imtahan sessiyasında olduğu kimi, bu imtahanlarda da suallar tələbələrə əvvəlcədən təqdim edilib. Nəticələr imtahan keçirilən günlərdə fənn müəllimləri tərəfindən BMU-nun Elektron Məlumat Sisteminə yerləşdirilir. Nəticələrdən narazı qalan tələbələrin müraciətlərinin, yarana biləcək hər hansı şikayətin dərhal araşdırılması, həmçinin sessiyanın gedişinə operativ nəzarətin təmin olunması məqsədilə Qərargah və Apellyasiya Komissiyasının fəaliyyəti də davam edir. Bununla bağlı müvafiq qaydalarla ətraflı məlumatlandırılan tələbələr imtahan bitdikdən sonra 1 gün ərzində ərizə ilə Apellyasiya Komissiyasına müraciət etmək imkanına malikdirlər. Eyni zamanda, imtahanların gedişinin ardıcıl surətdə yoxlanılması, nəticələrin kafedra iclasları və fakültə Elmi şuralarında müzakirə edilməsi də diqqət mərkəzindədir.
Mayın 31-dən başlanan imtahan sessiyası iyulun 4-dək davam edəcək.
