Ən azı 2 min il yaşı olan indiyədək aşkarlanan ən qədim şərab antik Roma insanının qalıqları ilə eyni qabda tapılıb.
Hafta.az-ın “El País”ə istinadən yazdığına görə, İspaniyanın cənub-qərbindəki Karmona şəhərində yaşayan bir ailə 2019-cu ildə mülklərində təsadüfən məzar tapıb. Qədim Roma məzarında üç kişi və üç qadının qalıqları olan 6 qab var idi.
Alimlər yandırılmış meyit qalıqları olan bu qablardan birində qırmızı mayenin olduğunu görüb və onu tədqiq etməyə başlayıblar.
“Reports” jurnalında bazar günü dərc olunan məqalədə tapıntılarını izah edən tədqiqatçılar mayenin eramızın 1-ci əsrinə aid şərab olduğunu müəyyən ediblər.
Bundan əvvəl aşkar edilmiş ən qədim şərab 1867-ci ildə Almaniyadakı Qədim Roma məzarında tapılmışdı və eramızın 325-350-ci illərinə aiddir.
Tədqiqatçılar İspaniyada məzarın yaxşı saxlanmasına əsaslanaraq, qabdakı mayenin kənardan gəlmədiyinə əmin idilər.
Elm adamları daha sonra təxminən 5 litr mayeni analiz etdilər və bugünkü şərabların tərkibində elementlərin olduğunu aşkarlayıblar. Komanda şərablarda olan polifenol adlanan birləşmələrdən 7-ni müəyyən edib.
Daha sonra şərabın qırmızı və ya ağ olmasına baxan tədqiqatçılar bu şərabda şpris turşusunun olmadığını aşkarlayıblar. Qırmızı şərabın əsas piqmentinin əriməsi nəticəsində əmələ gələn bu maddənin olmaması 2 min illik içkinin ağ şərab olduğunu göstərir.
İndi qonurlaşan şərabın rəngi çox güman ki, kimyəvi reaksiyalardan qaynaqlanır.
Ölümün mühüm yer tutduğu Qədim Roma mədəniyyətində ölüləri axirətə göndərmək üçün qəbirə əşyaların qoyulması qeyri-adi deyildi. Tədqiqatçılar məqalədə yazır: "Şərabın çox simvolik və dəfn mərasimləri ilə sıx bağlı olduğu Qədim Roma dünyasında dini əhəmiyyətini nəzərə alsaq, dəfn əşyaları arasında şərab ola biləcək qabların tapılması təəccüblü deyil".
Yenə də araşdırma aparan Xose Rafael Ruiz Arrebola şərabın qabda saxlandığını ilk görəndə təəccübləndiklərini deyir. "Bu, bizim üçün əla idi, çünki hamımız arxeoloji kimya dünyasına həvəsliyik. Dünyanın ən qədim şərabının kəşfi hər gün baş verən hadisə deyil" deyib tədqiqatçı.
Sümüklərdən əlavə, şərabın olduğu qabda qızıl üzük və ehtimal ki, mərhumun yandırıldığı metal çarpayının bir parçası da var idi.
Keçən il aparılan araşdırmada məzarda qadın qalıqları olan qablardan birində ətir olan şüşə aşkar edilib.
Ruiz Arrebola deyir ki, 2 min illik şərab "azacıq da olsa" zəhərli deyil, ancaq qalıqlarla keçirdiyi vaxta görə içməzdən əvvəl tərəddüd edir: "Sümük qalıqları səbəbindən maye bir az buludlu olur. Amma mən bunun süzülə və sınaqdan keçirilə biləcəyini düşünürəm”.
