“Nvidia”nın baş direktoru Jensen Huang şirkətin 735 milyon dollarlıq səhmini satmaq istəyir, bu barədə ABŞ Qiymətli Kağızlar və Birja Komissiyasına (SEC) təqdim edilmiş sənədlərə istinadən “Barron’s” yazıb. Nəşr məbləği iyunun 5-də bağlanış qiyməti əsasında hesablayıb – hər səhm üçün 1224.4 dollar.
Sənədə görə, Huang mart ayında 31 mart 2025-ci ilə qədər 600 000-ə qədər “Nvidia” səhmini satmağı nəzərdə tutan ticarət planını qəbul edib.
“Nvidia” səhmləri iyunun 6-da 1209.98 dollar (-1.18%) səviyyəsində olub. İyunun 7-də isə Bakı vaxtı ilə saat 12:28-də premarketdə onlar 0.55% artıb.
İyunun 5-də “Nvidia”nın bazar dəyəri 3 milyard dolları ötüb. Şirkət kapitallaşmaya görə dünyada ikinci yeri tutur və yalnız “Microsoft”dan geri qalır. İyunun 6-da keçirilən ticarətin nəticələrinə görə, “Nvidia” yenidən “Apple”a uduzub: birincinin kapitallaşması azalaraq 2.976 trilyon dollar, ikincinin kapitallaşması isə 2.982 trilyon dollar təşkil edib.
May ayında “Nvidia” 2025-ci maliyyə ilinin birinci rübünün nəticələrini açıqlayıb. Şirkətin xalis mənfəəti illik müqayisədə təxminən 7.3 dəfə artaraq 14.88 milyard dollara çatıb. Mayın 22-də ticarətin açılışında şirkətin kapitallaşması Almaniya fond bazarını üstələyib.
