Azərbaycan xarici işlər naziri Ceyhun Bayramov Pakistana rəsmi səfəri çərçivəsində Pakistan İslam Respublikasının Baş naziri Şahbaz Şərif ilə görüşüb.
XİN-dən verilən xəbərə görə, görüş zamanı tərəflər, Azərbaycanla Pakistan arasında mövcud strateji əməkdaşlığın səviyyəsindən məmnunluq ifadə edərək, yüksək səviyyəli qarşılıqlı səfərlərin, habelə beynəlxalq təşkilatlar çərçivəsində qarşılıqlı dəstəyin önəmini vurğulayıb.

Tərəflər, iqtisadiyyat, ticarət, enerji, turizm, təhsil, elm və mədəniyyət, nəqliyyat, eləcə də müdafiə sahəsində əməkdaşlıq imkanlarını müzakirə ediblər.

Tərəflər hökumətlərarası iqtisadi komissiyanın iclaslarının mütəmadi əsasda keçirilməsinin önəminə diqqət çəkərək, ikitərəfli iqtisadi münasibətlərin, xüsusilə də enerji və qarşılıqlı sərmayə qoyuluşu sahələrində əməkdaşlığın inkişaf perspektivlərinə toxunublar.

Bununla yanaşı, Azərbaycan-Pakistan-Türkiyə üçtərəfli əməkdaşlıq formatının bütün istiqamətlər üzrə fəaliyyətinin gücləndirilməsinin qarşılıqlı faydalı əməkdaşlığa xüsusi töhfə verməklə yanaşı, hər üç ölkənin regional və qlobal mövqelərinin möhkəmlənməsinə xidmət edəcəyi diqqətə çatdırılıb.


Politoloq Natiq Miri “Sherg.az”a vurğulayıb ki, Azərbaycan-Türkiyə-Pakistan əlaqələri ilk növbədə müsəlman dövlətlərinin birliyidir:


“Bu bir çox islam ölkərinin ibrət götürəcəyi birlikdir və praktik nəticələri var. Türkiyə və Pakistanın Azərbaycanın 44 günlük Vətən müharibəsində mənəvi, hərbi, siyasi dəstəyi olub. Bu platforma bir çox kənar güclər üçün çəkindirici məqam idi. Ona görə də praktik nəticələrə malik birlik bir çoxlarına örnək ola bilər. Pakistanın Azərbaycan və qardaş Türkiyə müttəfiqliyi böyük əhəmiyyət daşıyır. Bu gün nüvə gücünə malik olan ölkələr özlərini toxunulmaz hesab edirlər. Həmin qüvvələr çətinə düşən kimi nüvə silahı dünyanı hədələyirlər. Belə olan halda Azərbaycan-Türkiyə birliyinin yanında nüvə ölkəsi olan Pakistanın yer alması platformaya əlavə güc qatır. Eyni zamanda, Pakistanın Mərkəzi Asiya ölkəsi olması da Azərbaycan və Türkiyənin həmin bölgələrdə mövqeylərini gücləndirir. Türk birliyinə Pakistanın əlavə olunması Avrasiyada əhəmiyyətli güc mərkəzinin yaranmasına səbəb olar. Bu gün Avrasiya dünyanın göbəyi sayılır. Avrasiyaya kim hökm edəcəksə, dolayısı ilə bütün dünyaya nəzarət edəcək firki boşuna deyilməyib. Hər zaman Pakistan və Azərbaycan-Türkiyə biri-birilərinin yanında olmalıdır. Çünki birlikdə daha güclüyük, güc isə azadlıq deməkdir”.