İran Prezident Administrasiyasının rəhbəri Qulamhüseyn Esmaili prezident İbrahim Rəisinin helikopter qəzasının yeni təfərrüatları barədə danışıb. Administrasiya rəhbərinin özü başqa helikopterdə uçurdu və o, sağ-salamat yerə enib. Siyasətçinin sözlərinə görə, uçuş zamanı hava şəraiti normal olub.
“Bu duman deyildi. Ola bilsin, dərənin dərinliyində duman var idi, amma bizim uçuş yolumuzda duman yox idi. Buludlar helikopterdən bir qədər yüksəkdə idi”, – deyə Qulamhüseyn Esmaili söyləyib.
Cənab Esmailinin dediyinə görə, cənab Rəisinin olduğu helikopterin pilotu digər pilotlara buludların üzərinə qalxmağı əmr edib. Pilotlar onlara deyilən kimi etdilər. Bundan təxminən 30 saniyə sonra cənab Esmaili ilə birlikdə helikopterin ekipajı prezidentin olduğu helikopterin yoxa çıxdığını görüblər.
Pilot bir neçə dövrə vuraraq prezidentin helikopterini tapmağa və ekipaj və ya sərnişinlərdən biri ilə əlaqə saxlamağa çalışıb.
Mayın 19-da İran prezidentinin helikopteri qəzaya uğrayıb. Mayın 20-də səhər saatlarında İranın Tavil kəndi yaxınlığında, Azərbaycanla sərhəddən 30 km aralıda prezidentin helikopterinin yanmış qalıqları aşkar edilib. Heç bir sərnişini xilas etmək mümkün olmayıb. İranla qonşu olan bəzi ölkələr hadisə ilə əlaqədar matəm elan edib.
