Azərbaycanda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına töhfə vermək məqsədilə genişmiqyaslı ağacəkmə aksiyası və fləşmob keçirilib.
COP29 Azərbaycan Əməliyyat Şirkəti Media və Kommunikasiya Departamentinin məlumatında daha sonra qeyd edilir ki, ictimaiyyətin diqqətini ətraf mühitin sağlamlaşdırılmasına, yaşıllıqların bərpasına və artırılmasına yönəltmək, ətraf mühitin mühafizəsinə, habelə iqlim dəyişikliyi ilə mübarizəyə töhfə vermək məqsədilə 500-dən artıq iştirakçı Bakı şəhəri ətrafında bir araya gəlib.
İştirakçılar Bakının Müşfiqabad qəsəbəsində Abşeron yarımadasının torpaq-iqlim şəraitinə uyğun 3 min Eldar şamı və zeytun ağacı əkib.
Ağacəkmə aksiyasından sonra könüllülərin iştirakı ilə Azərbaycanın bu il evsahibliyi edəcəyi və dünyanın ən mötəbər tədbiri hesab olunan COP29-a həsr olunan fləşmob nümayiş etdirilib.
Qeyd edək ki, ağacəkmə aksiyası və fləşmob COP29 Azərbaycan Əməliyyat Şirkəti, Ekologiya və Təbii Sərvətlər Nazirliyi, Azərbaycan Könüllü Təşkilatları İttifaqı tərəfindən birgə təşkil olunub. Tədbirdə dövlət orqanlarının, özəl təşkilatların, vətəndaş cəmiyyəti institutlarının nümayəndələri, tələbələr və könüllülər iştirak edib.
XQ
