"Qarabağ"ın legioneri Kevin Medina diqqət mərkəzinə düşüb.
Sportinfo.az xəbər verir ki, kolumbiyalı müdafiəçi "Instagram" hesabında paylaşdığı fotolarla gündəmə gəlib.
Azərbaycan Premyer Liqasının 32-ci turunun "Sumqayıt" ilə oyunundan sonra (0:1) Ağdam klubunda oyunçulara istirahət verilib. Kolumbiyalı müdafiəçi bu məqamdan maraqlı formada istifadə edib.
O, qardaşı ilə birlikdə cənub bölgəsinə - daha doğrusu, Masallıya səfər edib.
Kəndlərdən birinə səfər edən Kevin yerli əhali ilə vaxt keçirib, gəzməli-görməli yerlərdə olub, fermada şəxsən inək sağıb, Uşaq Gənclər İdman Şahmat Məktəbini ziyarət edib.
Medina səfər zamanı yaşadığı anları izləyiciləri ilə bölüşüb. "Fantastik insanlarla fantastik gün keçirdim", - deyə postda bildirib.
Onun paylaşımına komanda yoldaşları maraqlı reaksiya verib. "Qarabağ"ın keçmiş üzvü, hazırda Zaqreb "Dinamo"unda top qovan Mahir Emreli zarafatla "bu həyatı sevirsənsə, gəl fermamda işlə" rəyini yazıb.
