İranın arsenalında 2025-ci ilin aprelinə qədər rəqiblərinə qarşı potensial istifadəyə hazır olan 10 nüvə başlığı ola bilər.
Musavat.com xəbər veirr ki, bu barədə Böyük Britaniyanın “The Times” qəzeti Atom Enerjisi üzrə Beynəlxalq Agentliyin (AEBA) keçmiş baş direktor müavini Olli Heynonenə istinadən yazıb.
"Bu raketlərlə heç bir ölkəni məhv etmək mümkün deyil, ancaq onu təhdid edib daha yaxşı danışıqlar mövqeyi əldə etmək mümkündür", - o nəşrə müsahibəsində bildirib.
Heynonen həmçinin İranın oktyabrın 1-nə keçən gecə İsrailə atdığı raketlərin gələcəkdə nüvə başlıqlarının çatdırılması üçün istifadə oluna biləcəyini də iddia edib.
Qəzet yazır ki, ekspert əvvəllər AEBA-nın monitorinq missiyaları çərçivəsində bir neçə dəfə İranın nüvə obyektlərinə baş çəkib və Tehranın nüvə sektorunda yüksək vəzifəli rəsmiləri ilə əlaqə saxlayıb.
Bundan əvvəl İran prezidenti Məsud Pezeşkian bildirib ki, onun ölkəsi nüvə silahı yaratmağa can atmır, əksinə, Birgə Hərtərəfli Fəaliyyət Planı (BHFP) üzrə öhdəliklərin yerinə yetirilməsinə tam şəkildə qayıtmağa hazırdır.
Qeyd edək ki, BHFP 2015-ci ildə İran və Böyük Britaniya, Almaniya, Çin, Rusiya, ABŞ və Fransadan ibarət beynəlxalq vasitəçilər qrupu tərəfindən imzalanıb. Razılaşma 2004-cü ildə Qərb ölkələrinin İranı nüvə silahı hazırlamaqda ittiham edərək sanksiyalar tətbiq etməsi ilə başlayan böhrana son qoydu. Prezident Donald Tramp 2018-ci ildə ABŞ-ı müqavilədən çıxarmaq qərarına gəlib.
ABŞ prezidenti Co Bayden dəfələrlə Vaşinqtonu nüvə sazişinə qaytarmağa hazır olduğunu bildirib. Rusiya, Böyük Britaniya, Almaniya, Çin, ABŞ və Fransa 2021-ci ilin aprelindən BHFP-ni orijinal formasına qaytarmaq üçün İranla danışıqlar aparır. 10 noyabr 2022-ci ildə AEBA-nın baş direktoru Rafael Qrossi Vyanada danışıqların növbəti mərhələsinin nəticəsiz başa çatdığını bildirib.
Musavat.com
