Yeni Azərbaycan Partiyası Ağcabədi rayon təşkilatının inzibati binasında yerli təşkilatın sədri Rövşən Əhmədovun rəhbərliyi ilə sosial şəbəkə fəallarıvə könüllülərlə görüş keçirilib.
Görüşdə YAP Ağcabədi rayon təşkilatının məsləhətçisi Elşən Səfərov, Azərbaycan Dövlət Pedaqoji Universitetinin Ağcabədi filialı ƏPT sədri Mahir Səlimov, Ağcabədi Pedoqoji Kollecinin müəllimi Səbuhi Atakişiyev və sosial şəbəkələrdə fəal olan partiya üzvləri və könüllülər iştirak ediblər.
Tədbiri giriş sözü ilə açan YAP Ağcabədi rayon təşkilatının sədri Rövşən Əhmədov könüllü fəallara fədakar fəaliyyətlərinə görə təşəkkür edərək bildirdi ki, Parlament seçkilərindən sonra biz yeni mərhələyə qədəm qoymuşuq. Sentyabrın 1-də Milli Məclisə keçirilən seçkilərdə Yeni Azərbaycan Partiyasının namizədlərinin müdafiəsi istiqamətində və təbliğində sosial şəbəkə fəallarının da fəal iştirak etdiklərini vurğulayan Rövşən Əhmədov çıxışı zamanı onu da qeyd etmişdir ki, Yeni Azərbaycan Partiyası ölkəmizdə hüquqi dövlət, vətəndaş cəmiyyəti quruculuğu, demokratik inkişaf prosesində yaxından iştirak edir, müstəqil Azərbaycan dövlətinin yüksəlişində, tərəqqisində öz töhfələrini əsirgəmir. YAP-ın gücü onun öz ideya yükünü, ölkənin gələcək inkişafı ilə bağlı konseptual baxışlarını modernləşdirə və dünya təcrübəsi ilə zənginləşdirə, problemlərdən çıxış yollarını göstərə, ən mürəkkəb siyasi məsələlərlə bağlı konkret təkliflər irəli sürə bilməsindədir. Bütün bunlar YAP-ın ən müxtəlif sosial təbəqələrin etimadını qazanaraq ümumxalq partiyasına çevrilməsinə stimul vermişdir.
Tədbirdə gənc könüllülərdən Nərmin Qasımova və Lalə Mahmudova çıxış edərək, yeni dövrə yeni Azərbaycan devizi ilə qədəm qoyan və ölkəmizdə aparıcı siyasi qüvvə olan YAP-ın gənc fəalları olduqlarından qürur duyduqlarını bildirmiş, yeni çağrışlar fonunda üzərlərinə düşən missiyanı bundan sonra da layiqincə yerinə yetirməyə həmişə hazır olduqlarını vurğulamışdır.
Daha sonra görüş iştirakçıları arasında qarşılıqlı fikir mübadiləsi aparılıb və onları maraqlandıran suallar cavablandırılıb.
YAP Ağcabədi rayon təşkilatı tərəfindən tədbirin sonunda gənc fəallara könüllülərə Sertifikatlar, Fəxri Fərmanlar və Təşəkkürnamələr təqdim edilib.
Sonda tədbir iştirakçıları ilə xatirə şəkli çəkdirildi.
