Alimlər Süd Yolu qalaktikasında 4000 işıq ili uzaqlıqda Yerə bənzər planet tapıblar. Həmin planet Günəşin ağ cırtdana, Yerin isə məhv olmuş və donmuş bir yerə çevriləcəyi milyardlarla il sonra planetimizin mümkün taleyinin ilkin görünüşünü təqdim edir.
Qaynarinfo Phys.org-a istinadən xəbər verir ki, bu uzaq planet Berkli Kaliforniya Universitetinin astronomları tərəfindən Havay adalarında 10 metrlik Keck teleskopu ilə aparılan müşahidələrdən sonra aşkar edilib.
Gələcəkdə Günəş bu prosesdə Merkuri və Veneranı udaraq şar kimi şişəcək. Ulduzumuzun kütlə itkisi ilə qırmızı nəhəngə çevrilməsi digər planetləri bir az da irəli köç etməyə məcbur edəcək. Xarici təbəqələr yandıqda və sıx bir ağ cırtdan qaldıqda, Yer bu mərhələdən sağ çıxsa, bugünkündən iki dəfə böyük bir orbitdə olacaq.
"Bu nöqtədə Yerin 6 milyard ildən sonra qırmızı nəhəngə çevriləcək Günəş tərəfindən udulmaqdan xilas olub-olmayacağına dair fikir birliyimiz yoxdur. Hər halda, Yer planeti daha bir milyard il və ya daha çox yaşamaq üçün yararlı olacaq. Bundan sonra Yer qırmızı nəhəng tərəfindən udulma riskindən çox əvvəl okeanlar istixana effekti ilə buxarlanacaq", deyə tədqiqat rəhbəri Keminq Zanq bildirib.
Yeni kəşf edilmiş planet sistemi, tutqun ağ cırtdanın yaşayış zonasından xeyli kənarda olmasına və həyatın olma ehtimalı az olmasına baxmayaraq, sağ qalmış planetin nümunələrindən biridir. Ancaq bir vaxtlar günəşə bənzər bir ulduz yaxınlıqda olanda onun həyat şəraiti ola bilərdi.
"Bu (qırmızı nəhəng) dövrdə Yer kürəsində həyatın yaşayıb-yaşamayacağı məlum deyil. Amma ən önəmlisi odur ki, Yer qırmızı nəhəngə çevriləndə Günəş tərəfindən udulmasın. Keminq tərəfindən tapılan bu sistem, ilkin olaraq Yerə bənzər orbitdə olan, ev sahibi ulduzunun qırmızı nəhəng fazasından sağ çıxan Yerə bənzər planetin nümunəsidir", deyə Keminq Zanq isti Yupiterlər adlanan planetlər sinfinə istinad edərək bildirib.
O, əlavə edib ki, Yer kürəsi bir milyard il sonra Günəşin qırmızı nəhəng mərhələsində udulsa belə, bəşəriyyət xarici Günəş sisteminə sığınacaq tapa bilər. Avropa, Kallisto və Qanimed kimi Yupiterin bir neçə peykində, eləcə də Saturnun ətrafındakı Enseladda qırmızı nəhəngin xarici təbəqələri genişləndikcə əriyə biləcək donmuş su okeanları var.
"Günəş qırmızı nəhəngə çevrildikdə, yaşayış zonası Yupiter və Saturnun orbiti ətrafında hərəkət edəcək və bu peyklərin çoxu okean planetlərinə çevriləcək. Düşünürəm ki, bu halda bəşəriyyət ora köçə bilər", deyə alim yekunlaşdırıb.
Aydın
