İqlim konfransına müxtəlif ölkələrdən minlərlə ziyarətçinin səfər edəcəyi nəzərə alınaraq COP29 Azərbaycan Əməliyyat Şirkəti, Azərbaycan Yerüstü Nəqliyyat Agentliyi və Bakı Şəhər Dövlət Yol Polisi İdarəsinin birgə optimallaşdırdığı nəqliyyat sxeminin tətbiqi üzrə işlər davam etdirilir.
Əməliyyat Şirkətinin mətbuat ofisindən aldığımız məlumata əsasən, böyük ziyarətçi axınının səmərəli idarə edilməsi, eləcə də konfransın keçirildiyi günlərdə paytaxtda qonaqların və şəhər sakinlərinin rahat hərəkətinin təmin olunması məqsədilə icrası planlaşdırılan tədbirlər çərçivəsində Bakı şəhərinin bir sıra mərkəzi küçələrində xüsusi COP29 nəqliyyat zolaqlarının salınmasına başlanılıb. COP29 loqosunu əks etdirməklə işarələnən bu zolaqlar sürətli və fasiləsiz hərəkətin reallaşdırılması məqsədilə tədbir nəqliyyatı üçün ayrılıb.
Konfrans zamanı həmin zolaqlardan yalnız ictimai nəqliyyat vasitələri və tədbirlə əlaqədar xüsusi icazələri olan nəqliyyat vasitələri istifadə edəcək. Konfransa qədər isə müvafiq yol nişanları quraşdırılmayan zolaqlardan bütün nəqliyyat vasitələri istifadə edə bilər.
Bundan əlavə, konfrans zamanı şəhərin müxtəlif əsas hissələrində, ümumilikdə, 14 nəqliyyat qovşağının təşkili planlaşdırılıb. Eyni zamanda, Bakı Stadionunun, şəhər metro stansiyalarının xəritəsi, hotel, yaşayış komplekslərinin sıx yerləşdiyi ərazilər və digər amillər nəzərə alınaraq planlaşdırılan nəqliyyat qovşaqları şəbəkəsi müxtəlif marşrut və nəqliyyat sxemlərini özündə ehtiva edəcək.
Sxemlər barədə hərəkət iştirakçıları davamlı olaraq məlumatlandırılacaq. Belə ki, bu qovşaqların strateji yerləşməsi istər qonaqların, istərsə də şəhər sakinlərinin müxtəlif növ nəqliyyat vasitələrinə rahat və maneəsiz çıxışını və təyinat nöqtəsinə rahat çatmaları üçün sərf edilən zamanı minimallaşdıracaq. Təyin olunacaq əhatəli nəqliyyat marşrutları üzrə tədbir əməliyyatlarının səmərəli təşkili üçün yüzlərlə taksi və 400-ə yaxın avtobus, o cümlədən ekspres ictimai avtobuslar, xüsusi “konfrans avtobusları” və “hava limanı avtobusları”nın hərəkəti təşkil edilərək müntəzəm sərnişindaşıma xidməti icra olunacaq.
Nəqliyyat sxeminin tətbiqində əsas amillərdən biri də tədbirin keçiriləcəyi günlərdə vətəndaşların şəxsi avtomobillərindən istifadəni minimuma endirilməsi məqsədilə əlçatan və rahat alternativlərin gerçəkləşdirilməsidir.
