Müəllif:Ayşən İmanova/Banco.az
Amerikanın "United Airlines" aviaşirkəti "SpaceX"in "Starlink" peyk interneti sayəsində uçuşlarında pulsuz Wi-Fi təqdim etməyi planlaşdırdığını açıqlayıb.
Banco.az xəbər verir ki, bu barədə “The Verge” məlumat yayıb.
Məlumata görə, xidmətin sınaqlarına 2025-ci ilin əvvəlində başlanacaq. Bundan sonra "Starlink"in pulsuz Wi-Fi-ı daşıyıcının 1000-dən çox təyyarəsində mövcud olacaq.
“United Airlines”ın baş direktoru Skott Kirbi bildirib ki, bu xidmət sərnişinlərə dünyanın demək olar ki, istənilən yerində yerdə edə biləcəkləri hər şeyi bir təyyarədə etməyə imkan verəcək.
Qeyd olunub ki, “Starlink” sərnişinlərə 100 ms-dən az gecikmə ilə ən azı 100 Mbit/s ortaq qoşulma sürəti təqdim etməyi planlaşdırır. Bu parametrlər axınlı videoya fasiləsiz baxmaq və videokonfranslarda iştirak etmək üçün kifayətdir.
