“Barselona”nın sabiq müdafiəçisi Jerar Pike Kataloniya klubunun ispaniyalı gənc hücumçusu Lamin Yamal haqda söhbət açıb:
Arena.az Pikenin bu barədə fikrini təqdim edir:
“Düşünürəm ki, onun oyununda ən təəccüblü məqam meydanda fəaliyyət göstərdiyi yetkinliyidir. O, öz mövqeyində özünü necə yerləşdirməyi, arxa müdafiəçiyə necə hücum etməyi mükəmməl başa düşür. Lamin onun yöndəmsiz vəziyyətdə olduğunu görsə, topu saxlamaq üçün hər şeyi edəcək. İnanıram ki, o, çox yüksək səviyyəli və böyük potensiala malik futbolçudur. Ümidvaram ki, yaxın illərdə Yamal “Barselona” üçün ən vacib futbolçu olacaq”, deyə Jerar Pike vurğulayıb.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsi 2026-cı ilin iyun ayının sonuna qədər qüvvədədir.
2023/2024 mövsümündə Yamal “Barselona”nın heyətində bütün yarışlarda 50 oyuna çıxıb, 7 qol vurub və 10 məhsuldar ötürmə verib.
Cari mövsümdə isə Yamal “blauqrana”nın heyətində bütün yarışlarda 4 oyuna 1 qol və 4 məhsuldar ötürmə ilə fərqlənib.
Yamal 2023-cü ilin sentyabrında debüt etdiyi İspaniya yığmasının heyətində 15 oyun keçirib, 3 qol vurub, 8 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı vingerin transfer dəyərini 120 milyon avro məbləğində qiymətləndirir.
