Fransada 71 yaşlı Dominik P. adlı kişi həyat yoldaşına qarşı ağır cinsi cinayətlər törətdiyinə görə mühakimə olunur. Təqsirləndirilən şəxs on ildən artıq müddətdə həyat yoldaşına sistematik şəkildə cinsi təcavüz etməkdə və onlarla kişini bu əməldə iştirakını təmin etməkdə ittiham olunur.
Qlobal.net xəbər verir ki, iddiaya görə, Dominik P. arvadına bir neçə dəfə narkotik verib, qadın huşunu itirdikdən sonra internet vasitəsilə tanımadığı kişilərlə əlaqə saxlayıb və onları evinə dəvət edib. Həmin şəxslər qadına cinsi təcavüz ediblər.
Qadının vəkilləri müvəkkilinin bu proses zamanı baş verənlərdən tamamilə xəbərsiz olduğunu bildiriblər. İstintaq çərçivəsində polis ən azı 92 zorlama hadisəsində 72 müxtəlif kişinin əli olduğunu müəyyən edib. Həmin şəxslərdən 50 nəfərin şəxsiyyəti müəyyən edilib və müttəhimlə birlikdə mühakimə olunur.
BBC-nin xəbərinə görə,  zərərçəkmiş qadın 2020-ci ildə baş verənlərdən polisə məlumat verdikdən sonra xəbər tutub. Vəkili bu işin qadın üçün "dəhşətli sınaq" olacağını və ilk dəfə bu hücumların video çəkilişlərinə baxacağını bildirib. 
Müttəhim 2020-ci ilin sentyabrında bir ticarət mərkəzində qadınların ətəklərini gizli şəkildə lentə alarkən tutulduqdan sonra başladılan istintaq nəticəsində polis kişinin kompüterində arvadının yüzlərlə huşsuz fotoşəkili və videosu tapıb. İddia olunur ki, bu görüntülər cütlüyün evində baş verən çoxsaylı cinsi zorakılıqları əks etdirir. Hücumların 2011-ci ildə başladığı güman edilir. Dominik P. də bu hücumları qeydə aldığını etiraf edib.