“Dövlətin rəsmi mövqeyi qarşısında Solovyovun fikirləri onu Rusiya vətəndaşı kimi hüquqi məsuliyyətə cəlb edir”-Cəsarət Hüseynzadə

“Crosus City Hall konsert zalında törədilmiş və xeyli sayda günahsız insanların ölümünə səbəb olan hadisə ilk növbədə Azərbaycan dövlətini, cəmiyyətini narahat edən əsas məqamlardan biridir. Çünki Azərbaycan müstəqilliyinin ilk illərində dəfələrlə terror hadisələri ilə üz-üzə qalıb. Bu baxımdan Azərbaycan xalqının bu kimi hadisələrə hər zaman qarşı çıxdığını birmənalı şəkildə bütün dünya görüb. Rusiyalı jurnalist Vladimir Solovyov baş verən terror aktında bizi günahlandırması ilə birinci dəfə deyil ki, antiAzərbaycan mövqeyini nümayiş etdirir”.

Bu fikirləri Editor.az-a açıqlamasında “İnformasiya və Sosial Təşəbbüslərə Dəstək” İctimai Birliyinin sədri Cəsarət Hüseynzadə deyib.

Onun sözlərinə görə, həm İkinci Qarabağ müharibəsindən əvvəlki, həm də sonrakı dövrdə Azərbaycana qarşı ən kəskin formada mübarizə aparan şəxslərdən biri Solovyov olub:

“Onun apardığı verlişlərdə daima Azərbaycana qarşı bir xətt var. Bu xətt isə bir neçə istiqamətdə birləşir. Hamıya məlum olduğu kimi, Solovyov erməniəsilli jurnalistlərlə işbirliyi görür. Bu məsələnin görünən tərəfidir. Məsələnin görünməyən tərəfi isə bu jurnalist Rusiyada yaşayan erməni lobbisi nümayəndələrinin maddi dəstəyi ilə Azərbaycana qarşı kampaniya aparır. Əgər bir şəxs davamlı olaraq “qara piar” kampaniyası aparırsa, demək ki, onun arxasında müəyyən qüvvələr durur.

Digər tərəfdən Rusiya hökumət dairələrində də təmsil olunan bəzi qüvvələr Solovyova dəstək olur. Həmin qüvvələr Azərbaycan-Rusiya münasibətlərində müəyyən qədər soyuqluq yaratmağa çalışır. Hazırda isə Bakı-Moskva arasında isti münasibətlər var, iki ölkə arasında müəyyən sahədə əməkdaşlıqlar var. Son dövrlər Rusiyanın Azərbaycana qarşı münasibətində beynəlxalq hüquqa yaxın mövqe sərgilədiyi müşahidə olunur. Ancaq Rusiya hakim dairələrində bəzi qüvvələr münasibətlərin isti olmasını istəmir, ona görə də Solovyov kimi jurnalistlərdən alət kimi istifadə edirlər. Ancaq artıq Solovyovun mövqeyi hüquqi məsuliyyət də yaradır.

Belə ki, Rusiya Prezidenti Vladimir Putin Moskvadakı terrorda İŞİD-i günahlandırırsa, onun mövqeyinin əksinə rusiyalı bir jurnalistin hədəfi yayındırmaq məqsədi nəyə xidmət edir? Bu yalnız Azərbaycana qarşı aparılan qarayaxma kampaniyası deyil, Solovyovun terror aktında Azərbaycanı günahlandırması həm də Rusiya dövlətinə qarşı xəyanətdir. Çünki Rusiya Təhlükəsizlik Xidməti orqanları konkret şəkildə bu hadisənin kimlər tərəfindən törədildiyini bildirir. Dövlətin rəsmi mövqeyi qarşısında Solovyovun fikirləri onu Rusiya vətəndaşı kimi ciddi məsuliyyətə cəlb edir. Belə ki, o Rusiya dövlətinin rəsmi mövqeyinə xələl gətirən, yanlış informasiya yayan şəxs kimi ittiham olunmalıdır”.

//Gülnarə Abasova, Editor.az