ABŞ Gürcüstanın “xarici təsir” qanununun Kremldən ilhamlanaraq hazırlandığını bəyan edib

ABŞ Dövlət Departamenti Gürcüstanın hakim Gürcü Arzusu partiyasının təqdim etdiyi “Xarici təsirlərin şəffaflığı haqqında” qanun layihəsinin Kremldən ilhamlanaraq hazırlandığını bəyan edib.

APA-nın Tbilisi müxbiri xəbər verir ki, Dövlət Departamentin mətbuat katibi Metyu Miller ABŞ-nin sözügedən qanun layihəsinə görə son dərəcə məyus olduğunu qeyd edib.

“Gürcüstan parlamentinin Kremldən ilhamlanaraq hazırlanmış “xarici təsir” qanununu irəli aparmaq qərarından ciddi məyus olduq. Məqsəd şəffaflığı təşviq etməkdirsə, Kremldən ilhamlanaraq hazırlanmış bu cür qanunvericilik aktı uyğun deyil. Biz bütün tərəfləri dinc toplaşmaq hüququnu qorumağa çağırırıq”, - Metyu Miller qeyd edib.

O qeyd edib ki, Aİ-nin bəyan etdiyi kimi, qanun layihəsinin qəbul edilməsi Gürcüstanı Avrointeqrasiya yolundan çıxara bilər.

“Biz Avropalı müttəfiqlərimizə qoşularaq Gürcüstan vətəndaşlarının böyük əksəriyyətinin arzularına – Aİ-yə tam inteqrasiya olmaq istəyinə zidd olan qanunları qəbul etməməyə çağırırıq. Gürcüstanın vətəndaşlara xidmət edən və Gürcüstan iqtisadiyyatını yaxşılaşdırmaq üçün çalışan canlı vətəndaş cəmiyyəti var. Təklif olunan qanun layihəsi qəbul olunacağı təqdirdə ifadə azadlığını məhdudlaşdıra, bu faydaları Gürcüstan vətəndaşlarına çatdıran təşkilatları ləkələyə və Gürcüstan vətəndaşlarının yüksək keyfiyyətli informasiyaya çıxışını təmin etməyə çalışan müstəqil media təşkilatlarına mane ola bilər”, - Metyu Miller qeyd edib.

Qeyd edək ki, Gürcüstan parlamenti ötən gün “Xarici təsirin şəffaflığı haqqında” qanun layihəsini birinci oxunuşda təsdiqləyib. Qanunun qüvvəyə minməsi üçün daha iki oxunuşdan keçməsi lazımdır.