"Həmkarlar İttifaqı İnstitutunun işlək olmadığı Azərbaycanda iş rejiminin azaldılması real görünmür"

Dünyanın inkişaf etmiş bir çox ölkələrində iş rejimi yeddi saatdır. Son zamanlar başqa ölkələr də yeni qanun qəbul edərək, yeddi saatlıq iş rejiminə keçib. Məlum olduğu kimi, Azərbaycanda iş rejimi səkkiz saatdır. Bəs Azərbaycanda nə zamansa, yeddi saatlıq iş rejiminə keçilə bilərmi? Bunun işçilər üçün müsbət və mənfi tərəfləri nələr olar? Səkkiz saat işləməsinə rəğmən, yetərli əməkhaqqı ilə təmin olunmayan orta statistik vətəndaşların iş saatının azaldılması ilə əməkhaqları daha da enə bilərmi? İqtisadçı ekspert Natiq Cəfərli Bizimyol.info xəbər portalının suallarını cavablandırıb. Natiq Cəfərli "Dünyanın bir çox ölkəsində hətta dörd günlük iş həftəsinə də keçiblər. Təbii ki, belə tendensiyalar var. Ancaq Azərbaycanın iqtisadi sisteminə baxanda, bunun ölkəmizdə tətbiq olunması ancaq dövlət idarələrində ola bilər. Azərbaycanda muzdla çalışanların yarıdan çoxu dövlət buüdcə təşkilatlarında çalışır. Özəl sektorda bunu tətbiq etmək çətindir. Çünki özəl sektorda işçilərin hüquqları daha az qorunur. O mənada ki, işçilər hər hansı bir tələb irəli sürürlərsə, işəgötürən işçini çıxara bilər və başqa işçilərin götürülməsi daha da asanlaşar. İşsiz adamların sayı çoxdur. Bu nöqteyi nəzərdən özəl sektorda daha çətindir. Azərbaycanın spesifik xüsusiyyətlərinə baxanda başqa problemlər də var. Məsələn; bizdə neft-qaz sektorudur, orda günün 24 saatı ilboyu iş dayanmır. Yəni orda da növbəlilik prinsipidir. Polis və digər hüquq-mühafizə orqanları bu sistemə keçə bilməzlər. Çünki onda gərək say kəskin artsın ki, iş rejimi dəyişsin və yaxud da istirahət hüququ daha da genişlənsin. Müəllimlər zatən beş günlük iş rejimində çalışırlar. Bir çox məktəblər beş gün işləyir. Yəni Azərbaycan iqtisadiyyatının spesifikasında belə bir qərarın qəbul olunması çox çətin görünür. Bu dəyişiklik o ölkələr üçün keçərlidir ki, orada həmkarlar təşkilatı olur. Onlar hökumətlə, işəgötürənlərlə görüşür, tələblər irəli sürürlər. Həmin ölkələrdə bunun kimi dəyişiklik mümkündür. Azərbaycanda isə Həmkarlar İttifaqı İnstitutu belə işlək vəziyyət deyil" - deyə, Natiq Cəfərli bildirib. Mətin Şükürlü, Bizimyol.info