“Qarabağ” “Neftçi”yə çatdı

Azərbaycan Kubokunun 2023/2024 mövsümünün finalçıları bəlli olub – “Qarabağ” 11-ci, “Zirə” 2-ci dəfə həlledici oyuna vəsiqə qazanıb.

Arena.az xəbər verir ki, Ağdam klubu bununla da turnirin rekordunu təkrarlayıb.

Buna qədər yalnız “Neftçi” 11 finalda oynayıb. “Qarabağ” əvvəlki 10 finalda 7 dəfə kuboku başı üzərinə qaldırıb. 1993, 2005/2006, 2008/2009, 2014/2015, 2015/2016, 2016/2017 və 2021/2022 mövsümlərində turnirin qalibi olan Ağdam təmsilçisi üç dəfə (1995/1996, 1997/1998, 1999/2000) həlledici matçda büdrəyib.

“Zirə” hərəyə iki dəfə yarımfinalı adlayan klublara çatıb. Buna “Kür Nur”, “Şəmkir” və “Sumqayıt” da nail olub.

Ümumilikdə isə tarix ərzində 18 komanda finalda iştirak edib:

“Neftçi”, “Qarabağ” – 11 dəfə
“İnter” (indiki “Şamaxı”) – 6 dəfə
“Xəzər Lənkəran”, “Qəbələ” – 5 dəfə
“Kəpəz” – 4 dəfə
“Bakı” – 3 dəfə
“Kür Nur”, “Şəmkir”, “Sumqayıt”, “Zirə” – 2 dəfə
“İnşaatçı”, “Şəfa”, “Xəzri”, “MKT-Araz”, “Karvan”, “Xəzər” (Lənkəran), “İnşaatçı” (Sabirabad) – 1 dəfə.