ABŞ Senatı Ukrayna, İsrail və Tayvana hərbi yardım göstərilməsi, Rusiyanın dondurulmuş aktivlərinin Kiyevə verilməsi məqsədilə müsadirə edilməsi, habelə Çinə qarşı əlavə sanksiyaların tətbiqi ilə bağlı qanun layihələri paketini təsdiqləyib. Amerika qanunverici orqanının yuxarı palatasının iclası C-SPAN kanalında yayımlanır .
Vətəninfo.az xəbər verir ki, təşəbbüsü 79 senator dəstəkləyib, 18 qanunverici isə əleyhinə çıxıb.
Aprelin 20-də qanun layihələri Konqresin Nümayəndələr Palatasında təsdiqlənib. Paketin həcmi 95 milyard dollar təşkil edib, o cümlədən Ukrayna üçün 61 milyard dollar, İsrail üçün 26 milyard dollar, həmçinin Qəzza zolağı da daxil olmaqla münaqişə zonalarında mülki insanlara humanitar yardım göstərmək üçün vəsait daxildir. Senat tərəfindən təsdiqləndikdən sonra paket imza üçün ABŞ prezidenti Co Baydenə göndəriləcək. Amerika lideri artıq onu imzalamağa söz verib.
Qanun layihələri paketi İran və Rusiya rəsmilərinə qarşı sanksiyalar tətbiq edəcək və İran pilotsuz təyyarələrinin istehsalı üçün istifadə edilən Amerika texnologiyalarının ixracını daha da məhdudlaşdıracaq. O, İran neftinin ixracını məhdudlaşdıran tədbirləri ehtiva edir. Bundan əlavə, paketə ABŞ-da TikTok-a mümkün qadağa təşəbbüsü də daxildir. Qanunvericilər Çinin ByteDance şirkətinə sosial şəbəkəni satmaq üçün bir il vaxt verməyi təklif edirlər, əks halda TikTok ABŞ-da qadağan oluna bilər.
Reuters xəbər verir ki , Bayden sənədi imzaladıqdan dərhal sonra Vaşinqton Kiyevə 1 milyard dollarlıq hərbi yardım paketi göndərəcək.
