Sözdən başlayan azadlıq!

Dövlət bütün şəraiti yaradıb...

Tarixin müxtəlif dövrlərində insanlar doğru, ədalətli və cəsarətli sözə ciddi ehtiyac duyublar. Uzun illər, əsrlər boyu sözü açıq və sərbəst formada söyləmə çətin, qorxulu, bəzən isə qeyri-mümkün olub. Haqq və ədalət, xoş güzəran naminə yorulmadan çarpışan insanlar azad sözü-həqiqət saydıqları sözü qorxusuz, azad şəkildə deyə bilmək uğrunda da mübarizə aparıblar. Tarixin müəyyən mərhələlərində insanlar buna nail olsalar da, bir çox hallarda dilləri ucbatından bəlaya düşüb, söylədikləri sözə və fikrə görə təqib edilib, müxtəlif formada cəzalandırılıb, bəzən isə zindanlara atılıblar. Lakin sivilizasiya inkişaf etdikcə, cəmiyyətin və dövlətin idarə olunması təkmilləşdikcə artıq azad söz daşıyıcısı sayılan mətbuatın sərbəst və maneəsiz fəaliyyətinə də imkan yaradılmasına nail olunub. Buna qədər isə mətbuat qadağa və repressiyalardan keçmiş senzura nəzarətinə dözməli olmuşdu.

Dövlətimizin siyasi həyatında sözün azadlığı uğrunda mücadilələr müxtəlif tarixi mərhələlərdən adlayıb keçib. Mətbuat, onun əsas silahı olan söz də, azad düşüncə də həqiqi azadlığa yalnız 20-ci əsrin sonlarında qovuşdu. Azad ölkədə azad sözün qüdrətini və dəyərini bilən söz sahibi xalqın sözünü eşidib, tələbini qəbul edib hakimiyyətə gəldi. 1993-cü ildə hakimiyyətə yenicə qayıtmış Heydər Əliyev gənc demokratik ölkədə mətbuatı azad bir müstəviyə çıxarmağı əsas vəzifələrdən biri kimi irəli sürmüşdü. Zaman isə göstərdi ki, söz və mətbuat azadlığının bərqərar olması davamlı prosesdir. Prezident İlham Əliyev Heydər Əliyevdən sonra bu təkmilləşdirmə prosesinin estafetini uğurla davam etdirir.

Dünya standartlarına cavab verən media formalaşıb...

Mövzu barədə “Yeni Azərbaycan”a danışan millət vəkili Ceyhun Məmmədov bildirib ki, Azərbaycanda fikir, söz və məlumat azadlığı ən yüksək səviyyədə təmin olunur. Onun sözlərinə görə, bu gün ölkəmizdə hər kəsin fikrini sərbəst ifadə etmək hüququ var: “Azərbaycan mətbuatında istənilən mövzunu işıqlandırmaq mümkündür. Söz azadlığı baxımından Azərbaycan dünyada və bölgədə qabaqcıl yerləri tutur. Hazırda ölkəmizdəki televiziyalarda, qəzetlərdə və radiolarda bu azadlıq özünü açıq-aydın şəkildə göstərir. Hər bir məsələ dövlət səviyyəsində tənzimlənir və dövlət bu prosesdə öz fəaliyyətini ən uyğun formada həyata keçirir. İnsanlar fikirlərini sərbəst bildirir, toplaşır və azad şəkildə fikir mübadiləsi aparırlar. Bu da plüralizm və söz azadlığı baxımından Azərbaycanın ön sıralardan olduğunu bir daha sübut edir. Ölkəmiz öz müstəqilliyini bərpa etdikdən sonra həyatın bir çox səhələrində olduğu kimi, mətbuatın inkişafında da dönüş yarandı, siyasi plüralizm və söz azadlığını təmin etmək üçün mühüm işlər həyata keçirildi. Azərbaycan mətbuatının sürətli inkişafı respublikamızda dünya standartlarına cavab verən müstəqil kütləvi informasiya vasitələrinin yaranmasına gətirib çıxardı. Sevindirici haldır ki, bu gün Azərbaycanda müasir dünya standartlarına cavab verən müstəqil media formalaşmaqdadır. 1998-ci ildə Heydər Əliyev tərəfindən mətbuat üzərində dövlət tənzimlənməsini nəzərdə tutan bütün mexanizmlər, o cümlədən senzura aradan qalxdı. Azərbaycan mətbuatının dövlət nəşriyyatına olan borcları əvvəlcə üç il müddətində donduruldu, sonra isə ləğv olundu. Hazırda bu məqsədyönlü işlər Heydər Əliyev siyasətinin layiqli davamçısı Prezident İlham Əliyev tərəfindən davam etdirilir. Bu gün qəzet, jurnal, informasiya agentliyinin təsis edilməsi üçün münbit şərait var”.

Qanunvericilik kifayət qədər mükəmməldir...

Millət vəkili qeyd edib ki, medianın fəaliyyət göstərməsi üçün Azərbaycanda heç bir əngəl yoxdur: “Bu məsələyə bir neçə aspektdən yanaşmaq lazımdır. Birinci, dövlətin görməli olduğu işlər və real durum, ikinci isə əlbəttə ki, medianın özünün üzərinə düşən vəzifələr. Dövlətə gəlincə, burada qanunvericilik kifayət qədər mükəmməldir. Müəyyən qüsurlar, yaxud da tənqidlər olsa da, dövlət medianın və jurnalistlərin azadlığının yüksək səviyyədə təmin edilməsi üçün bütün şəraiti yaradıb. Azərbaycanda heç kəs iddia edə bilməz ki, biz özümüzü azad şəkildə ifadə etməkdə çətiniklərlə üzləşirik”.

Y.SAHİB

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Fikir, söz və məlumat azadlığının, plüralizmin inkişaf etdirilməsi” istiqaməti üzrə hazırlanmışdır