Emmanuel Makron Ukraynaya qoşun yeritmək planlarından danışarkən, Paris üçün problem gözlənilməz yerlərdən gəldi. İndi Fransanın xüsusi inzibati ərazi qurumu adlandırılan Yeni Kaledoniya ərazisində iğtişaşlar baş verir. Parisdən 17 min km məsafədə mağazalar, apteklər və dövlət qurumları dağıdılıb, beş nəfər artıq rəsmi olaraq ölənlər siyahısındadır.
Yerli əhali qarşıdan gələn seçki islahatına etiraz etmək üçün çıxıb. Fransa hakimiyyəti uzaq adaya hərbi birləşmələr göndərib. Resursları zəif olan Fransa bu adanı iki əli ilə tutub. Axı Yeni Kaledoniyada dəmir filizi, manqan və xrom yataqları aşkarlanıb. Lakin adanın əsas sərvəti nikeldir. Bu metalın dünya ehtiyatlarının 20%-ə qədərinin adada olduğu güman edilir.
